రామ మందిరాన్ని సందర్శించిన తొలి విదేశీ ప్రధానిగా అరుదైన ఘనత
ఆలయ నిర్మాణ శైలి, శిల్పకళను ఎంతగానో మెచ్చుకున్న టోబ్గే
భూటాన్ ప్రధానమంత్రి దాసో షెరింగ్ టోబ్గే శుక్రవారం అయోధ్య శ్రీరాముడి ఆలయాన్ని దర్శించుకున్నారు. ఈ పవిత్ర క్షేత్రాన్ని సందర్శించిన తొలి విదేశీ దేశాధినేతగా ఆయన నిలిచారు. ప్రస్తుతం నాలుగు రోజుల భారత పర్యటనలో ఉన్న టోబ్గే, తన భార్య తాషి డోమాతో కలిసి అయోధ్యకు విచ్చేశారు. ఈ పర్యటన ఒక చారిత్రక మైలురాయి అని భారత విదేశాంగ శాఖ అభివర్ణించింది.
దాదాపు గంటా 40 నిమిషాల పాటు టోబ్గే దంపతులు ఆలయ ప్రాంగణంలో గడిపారు. గర్భగుడిలో రామ్ లల్లాకు ప్రత్యేక పూజలు నిర్వహించారు. అనంతరం రామ్ దర్బార్, హనుమాన్గఢీ ఆలయాలతో పాటు కుబేర తిల, జటాయు, సప్త మండపాలను కూడా సందర్శించారు. ఆలయ నిర్మాణ పనులను ఆసక్తిగా గమనించారు. శ్రీరామ జన్మభూమి తీర్థ క్షేత్ర ట్రస్ట్ ప్రధాన కార్యదర్శి చంపత్ రాయ్ వారికి స్వాగతం పలికి, ఆలయ విశేషాలను వివరించారు.
రామ మందిర నిర్మాణ శైలి, గోడలపై ఉన్న అద్భుతమైన శిల్పకళా నైపుణ్యాన్ని చూసి భూటాన్ ప్రధాని దంపతులు ముగ్ధులయ్యారు. ఆలయంలోని చెక్కడాలను చూసి ఆయన ప్రశంసలు కురిపించారు. రామ్ లల్లా విగ్రహం ముందు మూడుసార్లు మోకరిల్లి నమస్కరించిన టోబ్గే, హారతి అనంతరం తీర్థ ప్రసాదాలు స్వీకరించారు. ఈ మధుర క్షణాలను గుర్తుంచుకునేందుకు కొన్ని ఫొటోలు కూడా తీసుకున్నారు.
అంతకుముందు, భారత వైమానిక దళానికి చెందిన ప్రత్యేక విమానంలో షెరింగ్ టోబ్గే అయోధ్య విమానాశ్రయానికి చేరుకున్నారు. అక్కడ ఉత్తరప్రదేశ్ వ్యవసాయ శాఖ మంత్రి సూర్య ప్రతాప్ షాహి, అయోధ్య మేయర్ గిరీష్ పతి త్రిపాఠి, ఎమ్మెల్యే వేద్ ప్రకాశ్ గుప్తాతో పాటు ఉన్నతాధికారులు ఆయనకు ఘన స్వాగతం పలికారు. సెప్టెంబర్ 3 నుంచి 6 వరకు భూటాన్ ప్రధాని అధికారిక పర్యటనలో భాగంగా భారత్లో పర్యటిస్తున్నారు.
