ట్రావెల్ బస్సును ఢీ కొట్టిన ట్రక్కు..
ఢిల్లీ నుంచి అజమ్‌గఢ్‌కు వెళ్తోన్న ట్రావెల్స్ బస్సు
అలీగఢ్ సమీపంలో గ్లాస్ లోడ్‌తో వెళ్తోన్న ట్రక్కు ఢీ
ఐదు నెలల చిన్నారి సహా ఐదుగురు దుర్మరణం
తీవ్ర దిగ్భ్రాంతి వ్యక్తం చేసిన సీఎం యోగి ఆదిత్యానాథ్..
ఉత్తర్ ప్రదేశ్‌లో గురువారం తెల్లవారుజామున ఘోర రోడ్డు ప్రమాదం సంభవించింది. అలీగఢ్ వద్ద యమునా ఎక్స్‌ప్రెస్‌వేపై డబుల్ డెక్కర్ బస్సు, ట్రక్కు ఒకదానినొకటి ఢీకొట్టకున్నాయి. ఈ ఘటనలో ఐదు నెలల చిన్నారి సహా ఐదుగురు ప్రాణాలు కోల్పోయారు. ఈ ప్రమాదంలో మరో 15 మంది గాయపడ్డారు. ఢిల్లీలోని కశ్మీరే గేటు నుంచి తూర్పు యూపీలోని అజమ్‌గఢ్‌కు ప్రయాణికులతో వెళ్తోన్న ప్రయివేట్ ట్రావెల్స్‌కు చెందిన డబుల్ డెక్కర్ బస్సును.. టప్పాల్ సమీపంలో అద్దాలతో వెళ్తోన్న భారీ ట్రక్కు ఢీకొట్టింది. ఈ ప్రమాదం గురించి సమాచారం అందిన వెంటనే పోలీసులు.. హుటాహుటిన అక్కడకు చేరుకున్నారు. సహాయక చర్యలు చేపట్టి.. క్షతగాత్రులను చికిత్స కోసం ఆసుపత్రికి తరలించారు. గాయపడినవారిలో పలువురి పరిస్థితి విషమంగా ఉన్నట్టు తెలుస్తోంది.
మృతదేహాలను స్వాధీనం చేసుకుని పోస్ట్‌మార్టం కోసం తరలించినట్టు తెలిపారు. విపరీతంగా కురిస్తోన్న పొగమంచు కారణంగానే ఈ ప్రమాదం జరిగినట్టు పోలీసులు ప్రాథమికంగా నిర్దారించారు. ప్రమాదంతో ఎక్స్‌ప్రెస్‌వైపై ట్రాఫిక్ స్తంభించిపోయింది. దీంతో రోడ్డుకు అడ్డంగా ఉన్న వాహనాలను పోలీసులు యుద్దప్రాతిపదికన తొలగించి.. ట్రాఫిక్‌ను క్లియర్ చేశారు. ఘటనకు సంబంధించిన పూర్తి వివరాలు తెలియాల్సి ఉంది. బాధితులకు జెవార్‌లోని కైలాశ్ ఆసుపత్రిలో చికిత్స కొనసాగుతోందని పోలీసులు వెల్లడించారు. ప్రమాదానికి కారణమైన ట్రక్కు డ్రైవర్‌ను అదుపులోకి తీసుకున్నట్టు చెప్పారు.
రోడ్డు ప్రమాదంపై యూపీ సీఎం యోగి ఆదిత్యనాథ్ తీవ్ర దిగ్భ్రాంతి వ్యక్తం చేశారు. మృతుల కుటుంబాలకు తన ప్రగాఢ సానుభూతి తెలిపిన సీఎం యోగి.. క్షతగాత్రులకు మెరుగైన వైద్యం అందజేయాలని అధికారులకు సూచించారు. బాధితుల చికిత్సకు ప్రభుత్వం సాయం చేస్తుందని చెప్పారు. మృతుల కుటుంబాలకు రూ. 5 లక్షలు, గాయపడినవారికి రూ. 50 వేలు చొప్పున ప్రభుత్వం తరఫున ఆర్ధిక సాయం ప్రకటించారు. క్షతగాత్రులు త్వరగా కోలుకోవాలని ఆకాంక్షిస్తున్నట్టు ఈ మేరకు యోగి ప్రకటన చేశారు.
