నేటి సాయంత్రం 6 గంటలకు ట్రైలర్ విడుదల చేయనున్నట్లు వెల్లడి..
నిన్న విడుదల కావాల్సిన ట్రైలర్ విమాన ప్రమాదం కారణంగా వాయిదా..
జూన్ 27న ప్రేక్షకుల ముందుకు రానున్న ‘కన్నప్ప’ చిత్రం..
మంచు ఫ్యామిలీ ప్రతిష్ఠాత్మకంగా నిర్మిస్తున్న పౌరాణిక చిత్రం ‘కన్నప్ప’ నుంచి ఓ ముఖ్యమైన అప్డేట్ వ‌చ్చింది. ఈ సినిమా ట్రైలర్‌ను ఎప్పుడెప్పుడు విడుదల చేస్తారా? అని ఎదురుచూస్తున్న అభిమానులకు చిత్ర బృందం శుభవార్త అందించింది. వాయిదా పడిన ఈ ట్రైలర్‌ను నేటి సాయంత్రం 6 గంటలకు విడుదల చేయనున్నట్లు అధికారికంగా ప్రకటించారు. ఈ విషయాన్ని హీరో మంచు విష్ణు స్వయంగా తన ‘ఎక్స్’ ఖాతా ద్వారా అభిమానులతో పంచుకున్నారు. ఈ భారీ చిత్రంలో మంచు విష్ణు టైటిల్ రోల్ పోషిస్తుండ‌గా.. ‘మహాభారతం’ సీరియల్ ద్వారా పేరుపొందిన ముఖేశ్ కుమార్ సింగ్ ఈ సినిమాకు దర్శకత్వం వహిస్తున్నారు. శివ భక్తుడైన కన్నప్ప జీవిత గాథ ఆధారంగా ఈ సినిమాను అత్యంత భారీ బడ్జెట్‌తో, ఉన్నత సాంకేతిక విలువలతో తీర్చిదిద్దుతున్నారు.
పాన్ ఇండియా స్టార్ ప్రభాస్‌తో పాటు, బాలీవుడ్, కోలీవుడ్‌కు చెందిన పలువురు అగ్రశ్రేణి నటీనటులు ఈ సినిమాలో కీలక పాత్రలు పోషిస్తుండటంతో సినిమాపై అంచనాలు భారీగా నెలకొన్నాయి. నిజానికి, ‘కన్నప్ప’ ట్రైలర్‌ను నిన్న విడుదల చేయాలని చిత్ర యూనిట్ ముందుగా ప్రణాళిక వేసింది. అయితే, గుజరాత్‌లోని అహ్మదాబాద్‌లో జరిగిన దురదృష్టకర విమాన ప్రమాద ఘటన నేపథ్యంలో సంతాప సూచకంగా ట్రైలర్ విడుదల కార్యక్రమాన్ని వాయిదా వేస్తున్నట్లు తెలిపారు. తాజాగా పరిస్థితులు చక్కబడటంతో కొత్త విడుదల తేదీని ప్రకటించారు.
కాగా, ఈ చిత్రం ఈ నెల 27న ప్రపంచవ్యాప్తంగా ప్రేక్షకుల ముందుకు రానుంది. సినిమా విడుదలకు ముందే, ట్రైలర్ ద్వారా సినిమాలోని కీలక ఘట్టాలను, విజువల్ గ్రాండియర్‌ను ప్రేక్షకులకు పరిచయం చేయాలని మేకర్స్ భావిస్తున్నారు. ఈ రోజు సాయంత్రం విడుదల కానున్న ట్రైలర్, సినిమాపై ఉన్న అంచనాలను మరింత పెంచుతుందని చిత్ర వర్గాలు ఆశిస్తున్నాయి. భక్తి, త్యాగం ప్రధాన అంశాలుగా సాగే ఈ పౌరాణిక కావ్యం, ప్రేక్షకులకు ఒక సరికొత్త సినిమాటిక్ అనుభూతిని అందిస్తుందని చిత్ర బృందం ధీమా వ్యక్తం చేస్తోంది.
