స్ట్రోక్ లక్షణాలను నిర్లక్ష్యం చేయొద్దు..
సకాలంలో చికిత్సతో మెరుగైన కోలుకునే అవకాశం
శేరిలింగంపల్లి: మెదడుకు రక్త సరఫరాలో అంతరాయం ఏర్పడినా, మెదడులో రక్తస్రావం జరిగినా ప్రాణాలకు ముప్పు వాటిల్లే ప్రమాదం ఉందని మెడికవర్ హాస్పిటల్ డాక్టర్ హెచ్చరించారు. ఈ సందర్భగా ఆయన మాట్లాడుతూ స్ట్రోక్ లక్షణాలు కనిపించిన వెంటనే ఆసుపత్రికి చేరుకోవడం అత్యంత కీలకమని, చికిత్సలో ఆలస్యం మెదడుకు తీవ్రమైన నష్టం కలిగించి శాశ్వత పక్షవాతానికి దారితీయవచ్చని సూచించారు.
భారత్‌లో ప్రతి సంవత్సరం లక్షలాది మంది స్ట్రోక్ బారిన పడుతున్నారు. ముఖం ఒకవైపు వాలిపోవడం, చేయి లేదా కాలు అకస్మాత్తుగా బలహీనపడటం, మాట తడబడటం, చూపులో మార్పులు రావడం వంటి లక్షణాలను సాధారణ నీరసంగా భావించి నిర్లక్ష్యం చేయకూడదు. ముఖ్యంగా రాత్రి సమయంలో లక్షణాలు కనిపించినా ఉదయం వరకు వేచి చూడకుండా తక్షణమే వైద్య సహాయం పొందాలి.
గోల్డెన్ అవర్‌ను కోల్పోవద్దు
రక్తనాళంలో రక్తం గడ్డకట్టడం వల్ల వచ్చే ఇస్కీమిక్ స్ట్రోక్‌లో, అర్హులైన రోగులకు నిర్ణీత సమయంలో థ్రాంబోలైటిక్ చికిత్స అందించడం ద్వారా రక్తప్రసరణను పునరుద్ధరించే అవకాశం ఉంటుంది. కొందరికి రక్తనాళంలో గడ్డను తొలగించే ప్రత్యేక చికిత్స కూడా అవసరమవుతుంది. అయితే, ఏ చికిత్స అందించాలనేది బ్రెయిన్ స్కాన్, లక్షణాలు ప్రారంభమైన సమయం, రోగి ఆరోగ్య పరిస్థితిని బట్టి వైద్యులు నిర్ణయిస్తారు.
బీపీ, షుగర్ ఉన్నవారు మరింత అప్రమత్తంగా ఉండాలి
అధిక రక్తపోటు, మధుమేహం, అధిక కొలెస్ట్రాల్, ధూమపానం, అధిక మద్యపానం, కొన్ని గుండె సంబంధిత సమస్యలు స్ట్రోక్ ముప్పును పెంచుతాయి. వీటిని నియంత్రించడంతో పాటు క్రమం తప్పకుండా ఆరోగ్య పరీక్షలు చేయించుకోవడం, వైద్యుల సూచనల ప్రకారం మందులు వాడటం ద్వారా ప్రమాదాన్ని తగ్గించుకోవచ్చు.
చికిత్సతో పాటు పునరావాసం కూడా ముఖ్యం
స్ట్రోక్ వచ్చిన తర్వాత ప్రాణాలను కాపాడటంతో పాటు రోగి తిరిగి సాధారణ జీవితం గడిపేలా చేయడం కూడా ముఖ్యమే. ఫిజియోథెరపీ, ఆక్యుపేషనల్ థెరపీ, అవసరమైన స్పీచ్ థెరపీతో రోగి కదలికలు, మాట, రోజువారీ పనులు చేసుకునే సామర్థ్యం మెరుగుపడే అవకాశం ఉంటుంది.
మెడికవర్ హాస్పిటల్స్‌లో స్ట్రోక్ రోగులకు వారి ఆరోగ్య పరిస్థితికి అనుగుణంగా వైద్య చికిత్స, తదుపరి సంరక్షణ, పునరావాస సేవలు అందిస్తున్నారు. స్ట్రోక్ విషయంలో ప్రతి నిమిషం విలువైనదని, లక్షణాలను గుర్తించిన వెంటనే ఆసుపత్రికి చేరుకోవడమే వైకల్య తీవ్రతను తగ్గించడంలో కీలకమని వైద్యులు స్పష్టం చేస్తున్నారు.
ఈ కార్యక్రమంలో డాక్టర్ హరి రాధాకృష్ణ
సీనియర్ కన్సల్టెంట్ న్యూరాలజిస్ట్
మెడికవర్ హాస్పిటల్స్ తదితరులు పాల్గొన్నారు.
