క్రిప్టో కరెన్సీ లో బిట్ కాయిన్ విలువ ఎంతో ఎక్కువ..
రికార్డు పరుగును కొనసాగిస్తూ సాగిపోతున్న వైనం..
భారత కరెన్సీలో చూస్తే రూ. 78 లక్షల మార్క్ పైనే..
రెండు వారాల వ్యవధిలోనే ఏకంగా 40 శాతం పెరుగుదల..
బ్లాక్‌చైన్ టెక్నాలజీ ఆధారంగా నడిచే క్రిప్టో కరెన్సీల్లో బిట్ కాయిన్‌కు విలువ ఎక్కువ అన్న సంగతి తెలిసిందే. ఇటీవల ఈ బిట్ కాయిన్ ధర భారీగా పెరుగుతోంది. రికార్డు పరుగును కొనసాగిస్తూ.. కొద్ది్ రోజుల కిందట 99,645.39 డాలర్ల వద్ద ఆల్ టైమ్ గరిష్ట స్థాయిని తాకింది. భారత కరెన్సీలో ఇది రూ. 83 లక్షలకుపైనే ఉంటుంది. ఈ క్రమంలోనే లక్ష డాలర్ల మార్కును కూడా దాటుతుందనుకునే లోపే ప్రాఫిట్ బుకింగ్‌తో వెనక్కి తగ్గింది. ప్రస్తుతం అది మళ్లీ స్వల్ప నష్టాలతో 93 వేల డాలర్ల మార్కుపైన ట్రేడవుతోంది. భారత కరెన్సీలో చూసినట్లయితే రూ. 78 లక్షల మార్కుపైన ఉంది. 99 వేల డాలర్ల దగ్గర ఉన్న సమయంలో.. రెండు వారాల వ్యవధిలోనే ఏకంగా 40 శాతానికిపైగా పెరగడం విశేషం.
ఇక ప్రస్తుత ధర దగ్గర చూసినట్లయితే గత సెషన్లలో 5 శాతం తగ్గగా.. నెల రోజుల్లో 39 శాతం పెరిగింది. 6 నెలల్లో 34 శాతం పెరిగింది. ఈ ఏడాదిలో ఇప్పటివరకు 109 శాతం ఎగబాకింది. ఏడాది వ్యవధిలో దాదాపు 150 శాతం పుంజుకుంది. 2022లో క్రిప్టో ఎక్స్చేంజ్ ఎఫ్‌టీఎక్స్ సంక్షోభం ఎఫెక్ట్ కారణంగా 17 వేల డాలర్లకు దిగొచ్చిన బిట్‌కాయిన్ .. తర్వాత ఇప్పుడు రెండేళ్లలోనే ఏకంగా లక్ష డాలర్ల మైలురాయికి చేరడం గమనార్హం.
ముఖ్యంగా ఇటీవల అమెరికా అధ్యక్ష ఎన్నికల్లో రిపబ్లికన్ అభ్యర్థి డొనాల్డ్ ట్రంప్.. గెలవడంతోనే బిట్ కాయిన్ ధర ఆకాశమే హద్దుగా పెరుగుతోంది. ఈ క్రిప్టో కరెన్సీల విషయంలో ట్రంప్ సానుకూలంగా ఉండటం, తర్వాత కూడా ఉండొచ్చనే అంచనాలే దీనికి కారణం. క్రిప్టో కరెన్సీకి అమెరికాను రాజధానిగా చేస్తానని ట్రంప్ గతంలో ప్రకటించిన నేపథ్యంలో ఇంకా ఇది జోరందుకుంది. ఇక కొవిడ్ పరిణామాల ప్రారంభంలో 5 వేల డాలర్లుగా ఉన్న బిట్ కాయిన్ .. 2021 నవంబర్ నెలలో 69 వేల డాలర్ల స్థాయికి పెరిగింది. మళ్లీ భారీగా పడిపోయింది కూడా. ఇప్పుడు ట్రంప్ గెలవడంతో రికార్డు స్థాయికి చేరింది.
2009లో పరిచయమైన బిట్‌కాయిన్ ధర అప్పుడు జీరోగా ఉంది. 2011 ఫిబ్రవరిలో ఒక డాలరుకు చేరింది. ఇప్పుడు ప్రపంచంలోనే మోస్ట్ పాపులర్ క్రిప్టో కరెన్సీగా అవతరించింది. లక్ష డాలర్లకు సమీపంలోకి వచ్చింది. నవంబర్ 26న ఈ బిట్ కాయిన్ రేటు 93 వేల డాలర్లుగా ఉంది. ఈ లెక్కన ఉదాహరణకు 2011లో రూ. 100 ఇన్వెస్ట్ చేసినట్లయితే 2.22 బిట్‌కాయిన్స్ వచ్చేవి. అప్పట్లో ఒక డాలర్ ధర రూ. 45.50 గా ఉండేది. ఈ లెక్కన ఇప్పుడు ధర బిట్ కాయిన్ ధర రూ. 82 లక్షలపైనే ఉండగా.. 2.22 బిట్‌కాయిన్స్‌పై ఇది రూ. 1.65 కోట్లుగా ఉంది. అంటే 2011లో రూ. 100 పెట్టుబడిని రూ .1.65 కోట్లు చేసిందన్నమాట. ఇంకాస్త పెట్టుబడి అప్పట్లో ఎక్కువ పెడితే ఇంకా ఎక్కువ రిటర్న్స్ వచ్చేవని చెప్పొచ్చు
