బంగాళాఖాతం లో ఏర్పడిన అల్పపీడనం వేగంగా ఉద్ధృతమై, “మొంథా తుపాను (Cyclone Montha)”గా మారింది. ప్రస్తుతం ఇది పశ్చిమ మధ్య బంగాళాఖాతం పై తీవ్ర తుపానుగా కొనసాగుతోంది. వాతావరణ శాఖ తాజా నివేదిక ప్రకారం, మొంథా తుపాను విశాఖకు దక్షిణంగా 280 కి.మీ, కాకినాడకు ఆగ్నేయంగా 190 కి.మీ, మచిలీపట్నానికి దక్షిణ ఆగ్నేయంగా 110 కి.మీ దూరంలో కేంద్రీకృతమై ఉంది.
గడచిన 6 గంటల్లో తుపాను సుమారు 15 కి.మీ వేగంతో ఉత్తర–వాయవ్య దిశగా కదిలింది. ఈ తుపాను కాకినాడ సమీపంలో తీరం దాటే అవకాశం ఉందని వాతావరణశాఖ అంచనా వేసింది. దీని ప్రభావంతో గాలి వేగం 90 నుండి 100 కిలోమీటర్లు, గాలిబాటు వేగం 110 కిలోమీటర్లు వరకు ఉండవచ్చని తెలిపింది.
అయితే మొంథా తుపాను ప్రభావంతో ఆంధ్రప్రదేశ్లోని పలు జిల్లాలకు ఫ్లాష్ ఫ్లడ్ హెచ్చరికలు జారీ అయ్యాయి. వాతావరణ శాఖ ప్రకారం, రేపు ఉదయం వరకు గుంటూరు, కృష్ణా, తూర్పు గోదావరి, పశ్చిమ గోదావరి, నెల్లూరు, శ్రీకాకుళం, విశాఖపట్నం, విజయనగరం జిల్లాలతో పాటు తెలంగాణలోని భద్రాద్రి కొత్తగూడెం, ఖమ్మం, అలాగే ఒడిశాలోని గజపతి, గంజాం జిల్లాల్లో ఆకస్మిక వరదలు సంభవించే అవకాశం ఉంది.
ఆంధ్రప్రదేశ్ ముఖ్యమంత్రి చంద్రబాబు నాయుడు అధికారులను అత్యంత అప్రమత్తంగా ఉండాలని ఆదేశించారు. తీర ప్రాంత ప్రజలను సురక్షిత ప్రాంతాలకు తరలించడం, విద్యాసంస్థలకు సెలవులు ప్రకటించడం వంటి చర్యలు చేపట్టబడ్డాయి. ప్రభుత్వ రక్షణ బృందాలు, NDRF, SDRF సిబ్బంది తీర ప్రాంతాల్లో మోహరించబడ్డారు.
బంగాళాఖాత తీర ప్రాంతాల్లో సముద్రం ఉప్పొంగిపోతోంది. వాతావరణ శాఖ మత్స్యకారులు సముద్రంలోకి వెళ్లవద్దని హెచ్చరించింది. కాకినాడ, మచిలీపట్నం, నెల్లూరు తీరప్రాంతాల్లో ఎరుపు జెండాలు (Red Flags) ఎగురవేయబడ్డాయి. సముద్ర అలలు 2 నుండి 3 మీటర్ల ఎత్తు వరకు ఎగసే అవకాశం ఉందని సూచించింది.
తుపాను ప్రభావిత జిల్లాల్లో పాఠశాలలు, కళాశాలలు మూసివేయబడ్డాయి. పలు రైళ్లు, విమాన సర్వీసులు రద్దు లేదా మార్పులు చేయబడ్డాయి. విద్యుత్ సరఫరా, టెలికమ్యూనికేషన్ వ్యవస్థల్లో అంతరాయాలు సంభవించే అవకాశం ఉందని అధికారులు తెలిపారు.
