విశాఖపట్నం జాలరిపేటలో అన్నదాన కార్యక్రమంలో ప్రమాదం..
ఆరుగురిని కేజీహెచ్కు తరలించి ప్రత్యేక చికిత్స..
విశాఖపట్నం నగరంలో జరిగిన ఓ అన్నదాన కార్యక్రమంలో తీవ్ర అపశ్రుతి చోటుచేసుకుంది. వేడి గంజి మీద పడటంతో 16 మంది చిన్నారులతో పాటు పలువురు మహిళలు తీవ్రంగా గాయపడ్డారు. ఈ విషాద ఘటన శనివారం మధ్యాహ్నం జాలరిపేటలోని పిల్లా అప్పమ్మయ్య సంఘం ఆధ్వర్యంలో ఏర్పాటు చేసిన దుర్గాదేవి మండపం వద్ద జరిగింది.
దుర్గాదేవి మండపం వద్ద ఏర్పాటు చేసిన అన్నదాన కార్యక్రమానికి పెద్ద సంఖ్యలో చిన్నారులు, మహిళలు హాజరయ్యారు. ఆహారం పంపిణీ చేస్తుండగా, వంట ప్రదేశంలో ఉన్న మరుగుతున్న గంజి పాత్ర ప్రమాదవశాత్తు వారిపై పడింది. దీంతో అక్కడ ఉన్న చిన్నారులు, మహిళలు తీవ్రంగా గాయపడ్డారు. ఈ ఘటనతో ఆ ప్రాంతంలో ఒక్కసారిగా తీవ్ర గందరగోళం, ఆర్తనాదాలు మిన్నంటాయి.
వెంటనే స్పందించిన స్థానికులు, నిర్వాహకులు క్షతగాత్రులను విశాఖపట్నంలోని కింగ్ జార్జ్ ఆసుపత్రికి (కేజీహెచ్) తరలించారు. వీరిలో ఆరుగురి పరిస్థితి కాస్త ఆందోళనకరంగా ఉండటంతో వారిని ఆసుపత్రిలో చేర్చుకుని ప్రత్యేక వార్డులో చికిత్స అందిస్తున్నారు. మిగిలిన 10 మందికి ప్రథమ చికిత్స చేసిన అనంతరం వైద్యులు వారిని డిశ్చార్జ్ చేశారు.
స్పందించిన సీఎం చంద్రబాబు
ఈ ఘటనలో చిన్నారులు గాయపడడం పట్ల ముఖ్యమంత్రి చంద్రబాబు ఆవేదన వ్యక్తం చేశారు. ఆయన వెంటనే విశాఖ జిల్లా కలెక్టర్తో ఫోన్లో మాట్లాడి, చిన్నారుల ఆరోగ్య పరిస్థితి గురించి వివరాలు అడిగి తెలుసుకున్నారు. బాధితులకు ఎలాంటి లోటూ రాకుండా మెరుగైన వైద్య సేవలు అందించాలని అధికారులను ఆయన ఆదేశించారు.
అటవిశాఖపట్నం ఎమ్మెల్యే వంశీకృష్ణ శ్రీనివాస్.. కేజీహెచ్ సూపరింటెండెంట్ వాణితో మాట్లాడి మెరుగైన వైద్యం అందించాలని కోరారు. అలాగే, ఎన్టీఆర్ వైద్య సేవా ట్రస్ట్ చైర్మన్ సీతంరాజు సుధాకర్ ఆసుపత్రికి వెళ్లి గాయపడిన చిన్నారులను పరామర్శించారు. వారి ఆరోగ్య పరిస్థితిని వైద్యులను అడిగి తెలుసుకున్నారు. ఈ ఘటనతో స్థానికంగా విషాద ఛాయలు అలుముకున్నాయి. ఇలాంటి కార్యక్రమాల్లో నిర్వాహకులు తగిన భద్రతా చర్యలు తీసుకోవాలని పలువురు సూచిస్తున్నారు
