అమెరికాలోని ఉత్తర కాలిఫోర్నియాలో భారీ భూకంపం… స్కేల్‌పై 7.0గా నమోదు

అమెరికాలోని ఉత్తర కాలిఫోర్నియాలో భారీ భూకంపం వచ్చింది.అయితే దాని తీవ్రత రిక్టర్ స్కేల్‌పై 7.0గా నమోదయింది. గురువారం ఉదయం 10.44 గంటలకు ఫెర్న్‌డేల్‌కు నైరుతి దిశగా 100 కిలోమీటర్ల దూరంలో కేప్ మెండోసినో తీరంలో భూమి కంపించింది. పెట్రోలియా, స్కాటియా, కాబ్‌ తదితర ప్రాంతాల్లోనూ భూకంపం వచ్చినట్లు అమెరికా జియోలాజికల్ సర్వే తెలిపింది. ఉత్తర కాలిఫోర్నియా తీరానికి సమీపంలో భూకంప కేంద్రం 6 కిలోమీటర్ల లోతులో ఉన్నట్టు తెలిపింది.అయితే అమెరికా పశ్చిమ తీరంలో సునామీ హెచ్చరికలు జారీ చేయడం జరిగింది. భూకంప కేంద్రం నుంచి 300 కిలోమీటర్ల తీరం పొడవునా సునామీ వచ్చే అవకాశం ఉందని హోనొలులులోని సునామీ హెచ్చరికల కేంద్రం హెచ్చరించింది.
కాగా, భూ ప్రకంపనలు శాన్‌ఫ్రాన్సిస్కో వరకు వ్యాపించాయి. కొన్ని సెకన్ల పాటు భూమి కంపించినట్లు ప్రజలు తెలిపారు. ప్రజలు సురక్షిత ప్రాంతాలకు వెళ్లాలని అధికారులు సూచించారు.