- *నాగోల్ సర్కిల్లో ఓపెన్ స్పేస్ జోన్లో చెలరేగుతున్న అక్రమ నిర్మాణాలు.
- *సీజింగ్ బోర్డులకే పరిమితం.. నిబంధనల ఉల్లంఘనలో రికార్డులు!
- *సీజ్ చేసినా ఆగని పనులు | మౌనం వహిస్తున్న యంత్రాంగంపై పౌరుల ఆగ్రహం
- ఎల్బీనగర్ జోనల్ కమిషనర్ ఎస్.టి.ఎఫ్.టీం దృష్టి సారించాలి..!
*నాగోల్:
శాసనాలు, పురపాలక నిబంధనలు కేవలం సామాన్యులకే పరిమితమా? బడా నిర్మాణదారులకు అవేమీ వర్తించవా? పురపాలక అధికారులు స్వయంగా వేసిన సీజింగ్ ముద్రలను తుంగలో తొక్కి అక్రమ నిర్మాణాలు చేపడుతున్నా యంత్రాంగం నిమ్మకు నీరెత్తినట్లు వ్యవహరించడం వెనుక మతలబు ఏమిటి? ఇవీ నాగోల్ డివిజన్ పరిధిలోని స్థానిక ప్రజల నుంచి వ్యక్తమవుతున్న నిలదీతలు.
*’ఓపెన్ జోన్’ స్థలంలో నిబంధనల ఉల్లంఘన
నాగోల్ – బండ్లగూడ ప్రాంతంలోని డి-మార్ట్ వెనుక భాగంలో ఉన్న గోపాలకృష్ణ పురం, రహదారి సంఖ్య-2లోని సర్వే సంఖ్యలు 40, 41 పరిధిలోని ప్లాట్ సంఖ్య 204 (విస్తీర్ణం: 400 చదరపు గజాలు) లో ఎలాంటి పురపాలక అనుమతులు లేకుండా భారీ నిర్మాణం కొనసాగుతోంది. ఈ విషయంపై అధికారులు నోటీసులు ఇచ్చి బిల్లింగ్ సీజ్ చేశారు, సదరు నిర్మాణదారుడు కోర్టుకు వెళ్లి స్టే తెచ్చుకున్నాడు, కోటు నిబంధన ప్రకారం అతడు ఎలాంటి నిర్మాణం చేపట్టకూడదు కానీ యదేచ్ఛగా ఇటు కోర్టు ఆదేశాలను అటు మున్సిపల్ రూల్స్ ను ధిక్కరించి అక్రమంగా భారీ ఎత్తున నిర్మాణం చేపడుతున్నాడు.
మున్సిపల్ కౌన్సిల్ లాయర్లు ఈ విషయంపై దృష్టి సారించి మున్సిపల్ నిబంధనలకు ప్రభుత్వ మున్సిపల్ అధికారులకు సపోర్టుగా ఉండి , కోర్టు ఆదేశాలను ధిక్కరిస్తున్న అక్రమ నిర్మాణదారుడుకి శిక్ష పడేవిధంగా చూడాలని స్థానికులు డిమాండ్ చేస్తున్నారు.
*మాస్టర్ ప్లాన్ ఉల్లంఘన: మాస్టర్ ప్లాన్ ప్రకారం ‘ఓపెన్ స్పేస్ జోన్’ (ఖాళీ స్థలాల మండలం) గా వర్గీకరించిన ఈ స్థలంలో ఎలాంటి శాశ్వత నిర్మాణాలకు అనుమతి ఉండదు. కానీ, చట్ట విరుద్ధంగా ఇక్కడ నిర్మాణాలు చేపట్టారు.
*భద్రతా ప్రమాణాలకు తిలోదకాలు: ప్రాథమిక అగ్నిమాపక భద్రతా నియమావళిని, భవన నిర్మాణ నిబంధనలను పూర్తిగా పక్కనపెట్టి నిర్మాణ పనులు సాగిస్తున్నారు.
*చట్ట దిక్కరణ: గతంలో నాగోల్ సర్కిల్ పురపాలక అధికారులు ఈ నిర్మాణాన్ని సీజ్ చేసి హెచ్చరిక బోర్డులు ఏర్పాటు చేశారు. అయితే, ఆ సీజింగ్ ముద్రలను తొలగించి, అధికారుల ఆదేశాలను ధిక్కరిస్తూ నిర్మాణదారుడు యథేచ్ఛగా పనులు కొనసాగిస్తున్నాడు.
పర్యావరణ సూత్రాలకు విరుద్ధం నగర ప్రణాళిక శాస్త్రం ప్రకారం ఓపెన్ స్పేస్ జోన్లు నగరానికి ఊపిరితిత్తుల లాంటివి. పర్యావరణ సమతుల్యత, వర్షపు నీరు భూమిలోకి ఇంకిపోయేందుకు ఇవి అత్యంత కీలకం. ఇటువంటి స్థలాల్లో కాంక్రీట్ నిర్మాణాలు చేపట్టడం వల్ల భూగర్భ జలమట్టం పడిపోవడమే కాకుండా, భవిష్యత్తులో వరద ముప్పు పెరిగే ప్రమాదం ఉందని నగర ప్రణాళిక నిపుణులు హెచ్చరిస్తున్నారు.
*అధికారుల, మున్సిపల్ కౌన్సిల్ లాయర్ల పాత్రపై పౌరుల సందేహాలు
అధికారులు సీజ్ చేసిన స్థలంలో బహిరంగంగా పనులు జరుగుతున్నా స్థానిక యంత్రాంగం స్పందించకపోవడంపై స్థానికులు తీవ్ర అసంతృప్తి వ్యక్తం చేస్తున్నారు. ప్రజలు సంతకాలతో కూడిన ఫిర్యాదు పత్రాలను అధికారులకు అందజేసినప్పటికీ ఎలాంటి చర్యలు లేకపోవడం వెనుక అవినీతి కోణం ఉందనే విమర్శలు వెల్లువెత్తుతున్నాయి.
ప్రజల డిమాండ్:
కోర్టు ఆర్డర్లను, చట్టాన్ని సవాలు చేస్తూ అక్రమ నిర్మాణాలు చేపడుతున్న సదరు వ్యక్తిపై, అలాగే ఫిర్యాదులు వచ్చినా స్పందించకుండా నిబంధనలను ఉల్లంఘిస్తున్న అధికారులపై తక్షణమే ఉన్నతాధికారులు విచారణ జరిపి చట్టపరమైన కఠిన చర్యలు తీసుకోవాలని పౌరులు డిమాండ్ చేస్తున్నారు.
