భూములు, పర్యావరణ పరిరక్షణే ధ్యేయంగా సాగుతున్న ప్రజా చైతన్య యాత్ర
హైదరాబాద్
గోవా రాష్ట్రంలో కాంగ్రెస్ పార్టీ ఆధ్వర్యంలో నిర్వహిస్తున్న గోయ్ రాఖోన్న్ యాత్రలో ముఖ్యమంత్రి రేవంత్ రెడ్డి పాల్గొని ప్రసంగించారు. గోవా భూములు, పర్యావరణం, సంస్కృతి, వారసత్వం మరియు స్థానిక గుర్తింపును పరిరక్షించాలనే ప్రధాన ఉద్దేశంతో ఈ యాత్ర కొనసాగుతోంది.
గత నెల 22వ తేదీన పనాజీలో ప్రారంభమైన ఈ యాత్ర, రాష్ట్రంలోని నలభై నియోజకవర్గాలను కవర్ చేస్తూ ఇరవై ఏడు రోజుల పాటు సాగుతోంది. అక్టోబర్ 18వ తేదీతో ఈ యాత్ర ముగియనుంది. అధికార ప్రభుత్వ ప్రజా వ్యతిరేక విధానాలను ఎండగడుతూ, ప్రజలను చైతన్యపరిచేందుకు గోవా కాంగ్రెస్ విభాగం ఈ కార్యక్రమానికి శ్రీకారం చుట్టింది.
ఈ యాత్రలో భాగంగా చీఫ్టెన్స్ స్మారకం నుంచి కున్కోలిమ్ బస్టాండ్ వరకు భారీ పాదయాత్ర నిర్వహించారు. ఈ పాదయాత్రలో ముఖ్యమంత్రి రేవంత్ రెడ్డి ఉత్సాహంగా పాల్గొని, అనంతరం ఏర్పాటు చేసిన బహిరంగ సభను ఉద్దేశించి ప్రసంగించారు. గోవా పర్యటనను ముగించుకున్న అనంతరం ఆయన రాత్రికి దేశ రాజధానికి బయలుదేరి వెళ్లనున్నారు.
