బీసీ కులగణన సమావేశానికి అగ్రకుల రాజకీయ స్పాన్సర్‌షిప్‌ ప్రకటించడంపై బీసీ సంఘాల నాయకుల నిరసన – సమావేశం బహిష్కరణ

హైదరాబాద్

జాతీయ బీసీ కులగణన కోఆర్డినేషన్ కమిటీ ఆధ్వర్యంలో నాగ్‌పూర్ సమావేశానికి కొనసాగింపుగా హైదరాబాద్‌లోని తాజ్ దక్కన్ హోటల్‌లో ఈరోజు ఓబీసీ నాయకుల సమావేశం నిర్వహించారు. కులగణనలో ఓబీసీలకు ప్రత్యేక కాలమ్‌ ఏర్పాటు చేయాలని, ప్రతి కులానికి ప్రత్యేక యూనిక్ కోడ్ నంబర్ కేటాయించాలని, ఎస్సీ, ఎస్టీల మాదిరిగానే ఓబీసీల కులగణన కూడా నిర్వహించాలని ప్రధానంగా చర్చించేందుకు ఈ సమావేశం ఏర్పాటు చేశారు.

అయితే, సమావేశానికి సంబంధించిన ఖర్చులన్నింటినీ కవితకు చెందిన టీఆర్‌ఎస్‌ పార్టీ వ్యక్తులు భరిస్తున్నారని, వారే కార్యక్రమానికి స్పాన్సర్ చేస్తున్నారని ప్రకటించడంతో పలువురు బీసీ సంఘాల నాయకులు తీవ్ర అభ్యంతరం వ్యక్తం చేశారు. బీసీ ఉద్యమాన్ని బీసీలే స్వతంత్రంగా నడపాలనే స్పష్టమైన వైఖరితో సమావేశాన్ని బహిష్కరించి బయటకు వెళ్లిపోయారు.

ఈ బహిష్కరణలో బీసీ ఇంటెలెక్టువల్స్ ఫోరం చైర్మన్ టి. చిరంజీవులు, బీసీ పొలిటికల్ ఫ్రంట్ చైర్మన్ బాలనగోని బాలరాజు గౌడ్, బీసీఎఫ్‌కు చెందిన చెన్న రాములు ముదిరాజ్, కల్లుగీత కార్మిక సంఘాల నాయకుడు రమణ, బీసీ జర్నలిస్టు సంఘం నాయకుడు మేకల కృష్ణ తదితరులు పాల్గొన్నారు.

బీసీ ఇంటెలెక్టువల్స్ ఫోరం నాయకులు మెట్టు సూర్యప్రకాష్, చెన్న శ్రీకాంత్, అవ్వారు వేణు, కొండల్ గౌడ్, లింగేష్ యాదవ్, రాజు, బీసీ పొలిటికల్ ఫ్రంట్‌కు చెందిన దుర్గయ్య గౌడ్, బైరి శేఖర్, సింగం నగేష్ తదితరులు, పలువురు సభ్యులు కూడా సమావేశాన్ని బహిష్కరించారు.

ఈ సందర్భంగా బీసీ నాయకులు మాట్లాడుతూ, బీసీల సామాజిక, రాజకీయ హక్కుల కోసం ఇప్పటివరకు చిత్తశుద్ధితో కృషి చేయని రాజకీయ శక్తులు బీసీ సమావేశాల నిర్వహణకు ఆర్థిక సహకారం అందిస్తున్నట్లు ప్రకటించడం తప్పుడు సంకేతాలకు దారితీస్తుందని అభిప్రాయపడ్డారు. బీసీల కులగణన, జనాభా ప్రాతిపదికన ప్రాతినిధ్యం, ప్రతి కులానికి ప్రత్యేక గుర్తింపు కోడ్ వంటి అంశాలు బీసీల ఆత్మగౌరవానికి, భవిష్యత్తు హక్కులకు సంబంధించినవని స్పష్టం చేశారు.

బీసీ ఉద్యమం బీసీల నాయకత్వంలోనే, బీసీల స్వతంత్ర నిర్ణయాలతోనే కొనసాగాలి. బీసీల హక్కుల కోసం నిర్వహించే సమావేశాలు ఏ రాజకీయ పార్టీకి ప్రచార వేదికలుగా మారకూడదని వారు పేర్కొన్నారు. ఉద్యమ స్వతంత్రతకు భంగం కలిగించే విధంగా రాజకీయ స్పాన్సర్‌షిప్‌ను ప్రకటించడం బీసీ ఉద్యమ ప్రయోజనాలకు విరుద్ధమని అభిప్రాయపడ్డారు.

ఇదిలా ఉండగా, మాజీ మంత్రి వి. శ్రీనివాస్ గౌడ్ ఉదయం సుమారు 11:30 గంటల సమయంలో ఈ సమావేశానికి తానే స్పాన్సర్ చేసినట్లు ప్రకటించారు. అయితే, అప్పటికే తమ అభ్యంతరాలను వ్యక్తం చేసిన బీసీ సంఘాల నాయకులు సమావేశాన్ని బహిష్కరించి బయటకు వెళ్లిపోయారు.

నాగ్‌పూర్ సమావేశంలో తీసుకున్న నిర్ణయాలకు అనుగుణంగా ఓబీసీ కులగణనలో ప్రత్యేక కాలమ్‌ ఏర్పాటు చేయడం, ప్రతి కులానికి యూనిక్ కోడ్ కేటాయించడం, ఎస్సీ–ఎస్టీల తరహాలో ఓబీసీల కులగణన నిర్వహించడం వంటి ప్రధాన డిమాండ్ల సాధన కోసం బీసీ సంఘాల ఐక్య పోరాటం కొనసాగుతుందని నాయకులు స్పష్టం చేశారు.