మహేశ్వరం:
మహేశ్వరం నియోజకవర్గం పరిధిలోని తుక్కుగూడ – రావిర్యల క్షేత్రంలో కొలువైన శ్రీ సూర్యగిరి ఎల్లమ్మ తల్లి వార్షిక కల్యాణోత్సవం అత్యంత వైభవంగా, ఆధ్యాత్మిక శోభ మధ్య నేత్రపర్వంగా సాగింది. ఈ దివ్య వేడుకలో తెలంగాణ రాష్ట్ర కాంగ్రెస్ కమిటీ (టీపీసీసీ) ప్రధాన కార్యదర్శి, తుక్కుగూడ మున్సిపాలిటీ మాజీ మేయర్ చిగిరింత పారిజాత నర్సింహారెడ్డి దంపతులు భక్తిశ్రద్ధలతో పాల్గొని అమ్మవారికి ప్రత్యేక పూజలు సమర్పించారు.
*శాస్త్రోక్త పూజా కార్యక్రమాలు
కల్యాణ మహోత్సవం సందర్భంగా వేద పండితుల మంత్రోచ్ఛారణలు, మంగళవాయిద్యాల నడుమ ఆలయం ప్రాంగణం పులకించింది. అమ్మవారికి భక్తితో అర్చనలు, అభిషేకాలు నిర్వహించి పట్టువస్త్రాలు సమర్పించారు. ఈ పవిత్ర వేడుకలో మాజీ మేయర్ పారిజాత నర్సింహారెడ్డి దంపతులు అంతరాలయంలో అమ్మవారిని దర్శించుకుని తీర్థప్రసాదాలు స్వీకరించారు. అమ్మవారి దివ్య కల్యాణాన్ని తిలకించడం జన్మధన్యమంటూ వారు ఈ సందర్భంగా ఆనందం వ్యక్తం చేశారు.
*ప్రజాక్షేమం కోరుతూ ప్రత్యేక ప్రార్థనలు
పూజా కార్యక్రమాల అనంతరం పారిజాత నర్సింహారెడ్డి మాట్లాడుతూ.. శ్రీ సూర్యగిరి ఎల్లమ్మ తల్లి చల్లని చూపు నియోజకవర్గ ప్రజలందరిపై ఎల్లవేళలా ఉండాలని ఆకాంక్షించారు. పాడిపంటలతో, సుభిక్షంగా వర్ధిల్లేలా రైతాంగాన్ని, ప్రజలందరినీ ఆ తల్లి ఆయురారోగ్యాలతో, అష్ట ఐశ్వర్యాలతో కాపాడాలని మనసారా ప్రార్థించినట్లు తెలిపారు. ఈ ఆధ్యాత్మిక కార్యక్రమంలో స్థానిక ప్రజాప్రతినిధులు, ఆలయ ధర్మకర్తలు, పెద్ద సంఖ్యలో భక్తులు, కాంగ్రెస్ పార్టీ శ్రేణులు పాల్గొన్నారు.
