టీమిండియా స్టార్ క్రికెటర్ రవీంద్ర జడేజా భార్య రివాబా సోలంకి గుజరాత్ రాష్ట్రంలో మంత్రి పదవికి ప్రమాణ స్వీకారం చేశారు.
రివాబా సోలంకి 1990 నవంబర్ 2న జన్మించారు. తండ్రి హర్దేవ్ సింగ్ సోలంకి వ్యాపారవేత్త, తల్లి ప్రఫుల్లాబా సోలంకి భారత రైల్వేస్లో ఉద్యోగిణి. రివాబా రాజ్కోట్లో ఉన్నత విద్య అభ్యసించగా, మెకానికల్ ఇంజనీరింగ్లో గ్రాడ్యుయేట్ అయ్యారు.
రివాబా, రవీంద్ర జడేజా సోదరి నైనాబా ఫ్రెండ్గా పరిచయం అయ్యారు. తరువాత వారి స్నేహం ప్రేమలోకి మారింది. ఇరువురు కుటుంబాల సమ్మతితో 2016లో పెళ్లి చేసుకున్నారు. తదుపరి ఏడాదే, 2017లో వారికి కూతురు నిధ్యానా జన్మించింది.
పెళ్లికి ముందు నుంచే రివాబా నాయకత్వ లక్షణాలను ప్రదర్శించారు. రాజ్పుత్లకు చెందిన కర్ణి సేన మహిళా విభాగానికి అధ్యక్షురాలిగా సేవలందించారు. 2019లో బీజేపీలో చేరి, రాజకీయ రంగంలో అడుగు పెట్టారు.
2022 అసెంబ్లీ ఎన్నికల్లో రివాబా గెలిచి ఎమ్మెల్యేగా ఎన్నికై ప్రజలకు సేవ చేస్తున్నారు. ఆమె మాతృశక్తి చారిటబుల్ ట్రస్ట్ ద్వారా మహిళా సాధికారత, సంక్షేమం కోసం పలు కార్యక్రమాలు చేపడుతున్నారు.
చిన్న వయసులోనే మంత్రి పదవికి ప్రమాణ స్వీకారం చేయడం రివాబాకు ప్రత్యేక గుర్తింపు తెచ్చింది. జడేజా భార్యగా కాకుండా, తన ప్రత్యేక గుర్తింపును రాజకీయ రంగంలో ప్రదర్శిస్తూ ఉన్నారు.
