పన్ను చెల్లింపుదారులే దేశాభివృద్ధికి వెన్నెముక: గవర్నర్ శివప్రసాద్ శుక్ల..!

హైదరాబాద్‌లో వైభవంగా ఆదాయపు పన్ను దినోత్సవం | సంక్షేమం, భద్రతకు పన్నులే పునాది

*హైదరాబాద్:

పన్ను చెల్లించడం కేవలం చట్టబద్ధమైన బాధ్యత మాత్రమే కాదని, దేశ నిర్మాణంలో ప్రతి పౌరుడు చేసే గొప్ప భాగస్వామ్యమని బంజారాహిల్స్‌లో నిర్వహించిన 167వ ఆదాయపు పన్ను దినోత్సవ వేడుకల్లో స్పష్టమైంది. పన్ను చెల్లింపుదారులు దేశ ప్రగతిలో కీలక పాత్ర పోషిస్తున్నారని, నిజాయితీగా పన్నులు చెల్లించే వారే ఆర్థిక వ్యవస్థకు నిజమైన నిశ్శబ్ద శిల్పులని వేడుకల్లో ప్రతినిధులు పేర్కొన్నారు.

*పన్నుల రూపంలో ప్రజలకే సంక్షేమం
భారతీయ సంస్కృతిలో పన్నుల విధానానికి శాస్త్రీయమైన, ప్రజాహిత దృక్పథం ఉందనే అంశం ఈ సందర్భంగా చర్చకు వచ్చింది. ప్రజల నుంచి వసూలు చేసే రుసుమును మౌలిక సదుపాయాలు, దేశ భద్రత, సంక్షేమ కార్యక్రమాల రూపంలో ప్రభుత్వం తిరిగి ప్రజలకే అందిస్తుందని వివరించారు.

*అంతరిక్ష విజయాల వెనుక పౌరుల భాగస్వామ్యం
ఆధునిక భారత అభివృద్ధిలో ప్రతి పౌరుడి పాత్ర అత్యంత కీలకమని సభలో స్పష్టం చేశారు. సరిహద్దుల్లో పనిచేసే సైనికుల ఆధునిక ఆయుధాల కొనుగోలు నుంచి గ్రామీణ ప్రాంతాల్లోని రహదారుల నిర్మాణం వరకు, అలాగే చంద్రయాన్, గగన్‌యాన్ వంటి అంతరిక్ష ప్రాజెక్టుల విజయాల వెనుక పన్ను చెల్లింపుదారుల ప్రత్యక్ష సహకారం ఉందన్నారు.

*సాంకేతికతతో పెరిగిన పారదర్శకత
కాలానుగుణంగా ఆదాయపు పన్ను శాఖ తన పనితీరును పూర్తిగా మార్చుకుందని అధికారులు వెల్లడించారు.

*ముఖాముఖి లేని తనిఖీలు ఫేస్‌లెస్ అసెస్‌మెంట్

• వేగవంతమైన రీఫండ్ వ్యవస్థ
  ఈ విధమైన సాంకేతిక మార్పులతో పారదర్శకత పెరిగి, పన్ను చెల్లింపుదారులకు మెరుగైన సేవలు అందుతున్నాయని తెలిపారు. ‘వివాదం నుంచి విశ్వాసం’ వంటి కార్యక్రమాల ద్వారా పన్నుల శాఖ పౌరులతో విశ్వాసపూర్వక భాగస్వామ్యాన్ని పెంపొందిస్తోంది.

*ఆవిష్కరణల కేంద్రంగా హైదరాబాద్
హైదరాబాద్ నగరం ఆవిష్కరణలు, సమాచార సాంకేతికత, ఔషధ తయారీ మరియు కొత్త వ్యాపార సంస్థలకు ప్రధాన కేంద్రంగా ఎదిగిందని కొనియాడారు. తెలంగాణ యువత ప్రతిభ దేశ ఆర్థికాభివృద్ధికి విశేషంగా దోహదపడుతోందని వివరించారు. “వికసిత భారత్–2047” లక్ష్య సాధనకు పన్ను చెల్లింపుదారుల సంఖ్య పెరగడంతో పాటు స్వచ్ఛందంగా పన్ను చెల్లించే సంస్కృతి బలోపేతం కావాలని పిలుపునిచ్చారు.
ప్రతి రూపాయి బలమైన, స్వయంసమృద్ధి భారత నిర్మాణానికి పునాదిగా నిలుస్తుందని, అధికారులు పన్ను చెల్లింపుదారుల గౌరవాన్ని, విశ్వాసాన్ని కాపాడాలని సూచించారు.

*పురస్కారాల ప్రదానం – పత్రికా ఆవిష్కరణ
సమావేశం ముగింపులో అధిక మొత్తంలో ఆదాయపు పన్ను వసూలు చేసిన పన్నుల శాఖ అధికారులకు పురస్కారాలు అందించి అభినందించారు. ఇదే వేదికపై ఆదాయపు పన్ను శాఖ ప్రచురించిన ప్రత్యేక సమాచార పత్రిక ‘టాక్స్ స్పార్క్’ ను ఆవిష్కరించారు.
ఈ కార్యక్రమంలో ఆదాయపు పన్ను శాఖ ఆంధ్రప్రదేశ్, తెలంగాణ ముఖ్య కమిషనర్ సురేష్ బత్తినీ, కేంద్ర ప్రత్యక్ష పన్నుల మండలి పూర్వ అధ్యక్షుడు కేవి చౌదరిలతో పాటు ఇతర ఉన్నతాధికారులు, ఉద్యోగులు, పన్ను చెల్లింపుదారుల సంఘాల ప్రతినిధులు, పన్ను సలహాదారులు పాల్గొన్నారు.