పర్యావరణహిత గణేశ ప్రతిమలతో పండుగ జరుపుకోవాలి*

• కాలుష్య నివారణకు ప్రజలంతా సహకరించాలి: గవర్నర్‌ శ్రీ శివప్రతాప్‌ శుక్లా

హైదరాబాద్:
ప్రకృతి ఒడిలో పూజలందుకుని, అదే ప్రకృతిని కలుషితం చేసే రాక్షస క్రీడకు తెరపడాల్సిన తరుణమిది. భక్తి ముసుగులో జలనిధులను హాలాహలంగా మారుస్తున్న ప్లాస్టర్ ఆఫ్ పారిస్ (పీవోపీ) విగ్రహాలపై రాష్ట్ర గవర్నర్ శ్రీ శివప్రతాప్ శుక్లా స్పష్టమైన సమరశంఖం పూరించారు. పండుగ పేరుతో పచ్చని ధరణిని, పవిత్ర జలాలను విషమయం చేయడం దేవుడికి చేసే పూజ కాదని, ప్రకృతికి తలపెట్టే మహాద్రోహమని తేల్చిచెప్పారు.
సెప్టెంబర్ 14 నుంచి ప్రారంభం కానున్న గణేశ చతుర్థి వేడుకలను పురస్కరించుకుని, లోక్‌భవన్‌లో జరిగిన ప్రత్యేక కార్యక్రమంలో గవర్నర్ దంపతులు శ్రీ శివప్రతాప్ శుక్లా, శ్రీమతి జానకి శుక్లా స్వయంగా మట్టి ప్రతిమలను పంపిణీ చేసి ఈ విప్లవాత్మక చైతన్యానికి శ్రీకారం చుట్టారు.

*విషం చిమ్ముతున్న రసాయన వలయాలు
ఏడాదంతా జీవధారగా నిలిచే నదులు, చెరువులు, కుంటలను పండుగ ముగింపు పేరిట కొన్ని గంటల్లోనే శ్మశానవాటికలుగా మారుస్తున్న దుర్మార్గంపై నిక్కచ్చిగా ఆలోచించాల్సిన సమయం ఆసన్నమైంది. రసాయన రంగులు, కృత్రిమ పూతలతో రూపొందించే విగ్రహాలు నీటిలో కరగకపోగా, అందులోని సీసం, పాదరసం వంటి ప్రాణాంతక లోహాలు జలరాశులను శాశ్వతంగా నిర్వీర్యం చేస్తున్నాయి. ఈ విషపూరిత నీరు భూగర్భంలోకి ఇంకి మనుషుల ప్రాణాలను, మూగజీవాల ఆయువును హరిస్తున్న దారుణ పరిస్థితిని గవర్నర్ తీవ్రంగా ఎండగట్టారు. భక్తికి, ప్రకృతి వినాశానికి మధ్య ఉన్న అంతులేని వ్యత్యాసాన్ని ప్రజల గుండెలకు హత్తుకునేలా హెచ్చరించారు.

*మట్టిలో పుట్టి మట్టిలో కలిసే పవిత్రత
మట్టి గణేశులను పూజించడం కేవలం ఆచార వ్యవహారం మాత్రమే కాదు; అది సృష్టికి చేసే రక్షాబంధనం. నదిలో కలిసిన క్షణంలో ఎలాంటి మలినం లేకుండా నీటిలో కలిసిపోయే మట్టి ప్రతిమలు ప్రకృతితో మమేకమయ్యే మన సనాతన ధర్మానికి సజీవ సాక్ష్యాలు. పీవోపీ రాక్షస విగ్రహాలను బహిష్కరించి, ప్రతి ఇంటా మట్టి ప్రతిమలను ప్రతిష్ఠించడం ద్వారానే జల కాలుష్య రాక్షసుడిని అంతం చేయగలం. పర్యావరణ పరిరక్షణ అనేది కేవలం ప్రభుత్వాల బాధ్యత కాదని, ప్రతి పౌరుడి నైతిక కర్తవ్యమని ఈ వేడుక స్పష్టం చేస్తోంది.

• మీడియా తన వంతు పాత్ర పోషించాలి:
  ప్రకృతి వినాశనాన్ని నివారించడంలో నూతన చైతన్యాన్ని తీసుకురావాల్సిన బాధ్యత సమాచార రంగంపై సంపూర్ణంగా ఉంది. మట్టి ప్రతిమల గొప్పదనాన్ని, రసాయనాల వల్ల జరిగే సర్వనాశనాన్ని గడపగడపకూ చేరవేయడంలో పత్రికలు, ప్రసార మాధ్యమాలు అగ్నిలా పనిచేయాలి. జాతిని నిద్రలేపే ఈ మహోద్యమంలో ప్రతి పాత్రికేయుడు సైనికుడిగా మారి ప్రజలను జాగృతం చేయాలని గవర్నర్ పిలుపునిచ్చారు. పర్యావరణాన్ని రక్షించుకోలేకపోతే భవిష్యత్తు తరాలకు మనం మిగిల్చేది శూన్యమేనన్న కఠిన సత్యాన్ని ఈ పండుగ వేళ అందరూ గ్రహించాలి.