కందుకూరులో కేంద్ర ఎన్నికల కమిషనర్ ఏకపక్ష విధానాలపై ఉద్ధృత నిరసన ర్యాలీ
రంగారెడ్డి జిల్లా డీసీసీ అధ్యక్షురాలు చిగురింత పారిజాత నరసింహారెడ్డి నాయకత్వంలో హోరెత్తిన ఆందోళన
బడంగ్పేట్
దేశంలో ప్రజాస్వామ్యాన్ని అపహాస్యం చేస్తూ, ఓటర్ల జాబితా సవరణ పేరుతో అధికార పార్టీకి ఊಳగం చేస్తున్న కేంద్ర ఎన్నికల కమిషనర్ విధానాలపై కాంగ్రెస్ పార్టీ సమరశీల పోరాటానికి శ్రీకారం చుట్టింది. అఖిల భారత కాంగ్రెస్ కమిటీ పిలుపు మేరకు, రంగారెడ్డి జిల్లా మహేశ్వరం నియోజకవర్గం కందుకూరు మండల కేంద్రంలో కాంగ్రెస్ పార్టీ అనుకూల ఓట్లను అక్రమంగా తొలగిస్తున్న ఏకపక్ష సరళిని తీవ్రంగా నిరసిస్తూ భారీ నిరసన ర్యాలీ నిర్వహించారు.
రంగారెడ్డి జిల్లా డీసీసీ అధ్యక్షురాలు చిగురింత పారిజాత నరసింహారెడ్డి పటిష్టమైన నాయకత్వంలో మరియు చొరవతో సాగిన ఈ ప్రజాచైతన్య ర్యాలీకి అఖిల భారత కాంగ్రెస్ కమిటీ కార్యదర్శి, రాష్ట్ర సమన్వయకర్త సచిన్ సావంత్ ముఖ్య అతిథిగా విచ్చేసి ఉద్యమానికి దిశానిర్దేశం చేశారు.
*అంబేద్కర్ విగ్రహం వరకు కొనసాగిన నిరసన ప్రదర్శన
సామ నర్సింహారెడ్డి ఉద్యానవనం నుంచి ప్రారంభమైన ఈ మహా ప్రదర్శన, కందుకూరు పురవీధుల గుండా సాగుతూ బాబాసాహెబ్ డాక్టర్ బి.ఆర్. అంబేద్కర్ విగ్రహం వరకు కొనసాగింది. ఈ సందర్భంగా ర్యాలీలో పాల్గొన్న వేలాది మంది కార్యకర్తలు, నాయకులు కేంద్ర ఎన్నికల కమిషనర్ తీరుకు వ్యతిరేకంగా నినాదాలు హోరెత్తించారు. రాజ్యాంగబద్ధ సంస్థలను భ్రష్టుపట్టిస్తున్న ప్రధాన ఎన్నికల కమిషనర్ తక్షణమే తన పదవికి రాజీనామా చేయాలని ఈ వేదికగా తీవ్రంగా డిమాండ్ చేశారు.
*అధికార పార్టీ కుట్రలను తిప్పికొడతాం: చిగురింత పారిజాత నరసింహారెడ్డి
ఈ నిరసన కార్యక్రమంలో రంగారెడ్డి జిల్లా డీసీసీ అధ్యక్షురాలు చిగురింత పారిజాత నరసింహారెడ్డి మాట్లాడుతూ, ఎన్నికల సంఘం అధికార పార్టీకి తొత్తుగా మారి కాంగ్రెస్ పార్టీ మద్దతుదారుల ఓట్లను లక్ష్యంగా చేసుకుని తొలగిస్తోందని తీవ్ర ఆగ్రహం వ్యక్తం చేశారు. ఓటర్ల జాబితా సవరణలో నిబంధనలను తుంగలో తొక్కి, ఏకపక్షంగా వ్యవహరించడం రాజ్యాంగద్రోహంతో సమానమని ఆమె ధ్వజమెత్తారు. ప్రజాస్వామ్యాన్ని రక్షించుకునే వరకు కాంగ్రెస్ పార్టీ నిరంతరం పోరాడుతుందని, ప్రజల హక్కులను కాలరాసే ఏ శక్తినీ ఉపేక్షించేది లేదని హెచ్చరించారు.
*హాజరైన ప్రముఖ నాయకులు
ఈ బృహత్తర కార్యక్రమంలో మాజీ డీసీసీ అధ్యక్షుడు చల్లా నర్సింహారెడ్డి, నియోజకవర్గ బాధ్యులు కిచెన్నగారి లక్ష్మారెడ్డి, చేవెళ్ల నియోజకవర్గ బాధ్యులు భీమ్ భరత్, కాంగ్రెస్ మాధ్యమ విభాగం పూర్వ చైర్మన్ రామ్మోహన్ రెడ్డి, మాజీ శాసనసభ్యులు తీగల కృష్ణ రెడ్డి, ఎల్బీ నగర్ నియోజకవర్గ నాయకులు రాంమోహన్ గౌడ్, మార్కెట్ కమిటీ చైర్మన్ చిలుక మధుసూదన్ రెడ్డి, మరియు నాయకులు రాచమల్ల సిద్దేశ్వర్, తీగల అనిత హరినాథ్ రెడ్డి, శేఖర్ గౌడ్, ఏనుగు జంగా రెడ్డి, శ్రీనివాస్ గౌడ్, మండల అధ్యక్షుడు రాణప్రతాప్ రెడ్డి, స్థానిక సర్పంచ్ సరికొండ పాండు తదితరులు పాల్గొన్నారు.
వీరితో పాటు వివిధ మార్కెట్ కమిటీల చైర్మన్లు, సంచాలకులు, జిల్లా కార్యవర్గ సభ్యులు, మండల అధ్యక్షులు, ప్రజాప్రతినిధులు, సర్పంచులు, మాజీ నగరపాలక సభ్యులు, యువజన కాంగ్రెస్, ఎన్.ఎస్.యు.ఐ, మహిళా కాంగ్రెస్ కమిటీల సభ్యులు మరియు అశేష సంఖ్యలో కార్యకర్తలు ఈ నిరసన కార్యక్రమంలో పాల్గొని విజయవంతం చేశారు.
