రాజకీయాలకు అతీతంగా ప్రజా సంక్షేమమే ధ్యేయం
ఎల్బీనగర్:
ఎల్బీనగర్ నియోజకవర్గంలో ఎలాంటి రాజకీయాలకు తావులేకుండా అన్ని ప్రాంతాల్లోనూ అభివృద్ధి కార్యక్రమాలను ముమ్మరంగా చేపడుతున్నట్లు టీపీసీసీ ప్రచార కమిటీ చైర్మన్, మాజీ ఎంపీ మధుయాష్కి గౌడ్ స్పష్టం చేశారు. స్థానిక ప్రజల దీర్ఘకాలిక సమస్యల పరిష్కారమే లక్ష్యంగా ప్రభుత్వ యంత్రాంగం అడుగులు వేస్తోందని ఆయన పేర్కొన్నారు.
*ప్రధాన డివిజన్లలో వివిధ ప్రారంభోత్సవాలు
బీఎన్ రెడ్డి నగర్ డివిజన్ పరిధిలోని వైదేహీనగర్ కాలనీలో నూతనంగా నిర్మించిన సీనియర్ సిటిజన్ భవనాన్ని నాయకులు ఘనంగా ప్రారంభించారు. అదేవిధంగా వెంకటేశ్వర కాలనీలో కాలనీ ముఖద్వారం, బృందావన్ మిడోస్ మరియు భవానీ ఎక్లేవ్ కాలనీలలో నూతన ఓపెన్ జిమ్లను ప్రజలకు అందుబాటులోకి తీసుకువచ్చారు.
- తాగునీరు, డ్రైనేజీ సమస్యలకు శాశ్వత పరిష్కారం: సాహెబ్ నగర్ శివారు కాలనీలలో నెలకొన్న మంచినీరు, రోడ్లు మరియు డ్రైనేజీ ఇబ్బందికర అంశాలను దశలవారీగా పూర్తిగా పరిష్కరిస్తామని భరోసా ఇచ్చారు.
- ముంపు నివారణ చర్యలు: వర్షాకాలంలో తలెత్తే వరద నీటి ముంపు సమస్యల నివారణకు సంబంధిత అధికారులతో ప్రత్యేకంగా చర్చించి తక్షణ చర్యలు తీసుకుంటామని వెల్లడించారు.
*వివేకానంద పార్క్ పరిశీలన – వాకర్స్ విజ్ఞప్తులు
బీఎన్ రెడ్డి నగర్ డివిజన్ ఎన్జీవోస్ కాలనీలోని వివేకానంద పార్కును నాయకులు ఉదయం వేళ సందర్శించి మార్నింగ్ వాకర్స్తో మాట్లాడారు. పార్కులో పాడైపోయిన ఓపెన్ జిమ్ పరికరాల స్థానంలో నూతన పరికరాలు ఏర్పాటు చేయాలని, సీనియర్ సిటిజన్స్ యోగా సాధన కోసం ప్రత్యేకంగా యోగా షెడ్డును నిర్మించాలని వాకర్స్ అసోసియేషన్ సభ్యులు కోరారు.
ఈ విజ్ఞటనపై సానుకూలంగా స్పందించిన మధుయాష్కి గౌడ్, తక్షణమే స్పందించి పార్కులోని చెట్ల కొమ్మలు, ఇతర వ్యర్థాలను తొలగించాలని డిప్యూటీ కమిషనర్ను ఫోన్ ద్వారా ఆదేశించారు. అలాగే నూతన ఓపెన్ జిమ్ మరియు యోగ షెడ్డు నిర్మాణానికి త్వరలోనే ఏర్పాట్లు చేయిస్తామని హామీ ఇచ్చారు.
*కార్యక్రమంలో ప్రముఖుల భాగస్వామ్యం
ఈ కార్యక్రమంలో రోడ్ డెవలప్మెంట్ కార్పొరేషన్ మాజీ చైర్మన్ మల్రెడ్డి రాంరెడ్డి, సీనియర్ నేత ముద్దగోని రామ్మోహన్ గౌడ్, మాజీ కార్పొరేటర్లు మొద్దు లచ్చిరెడ్డి, ముద్దగోని లక్ష్మీ ప్రసన్న, రాగుల వెంకటేశ్వర్ రెడ్డి, మరియు ఇతర స్థానిక కాంగ్రెస్ నాయకులు, కాలనీ అసోసియేషన్ ప్రతినిధులు పెద్ద సంఖ్యలో పాల్గొన్నారు.
