చిరు వ్యాపారుల కుటుంబాలకు అన్ని విధాలా అండగా ఉంటాం…………………*బీజేపీ రాష్ట్ర అధికార ప్రతినిధి, శేరిలింగంపల్లి నియోజకవర్గ ఇన్‌చార్జ్ రవికుమార్ యాదవ్, గచ్చిబౌలి తాజా మాజీ కార్పొరేటర్ గంగాధర్ రెడ్డి *……………….
నానక్‌రామ్‌గూడలో చిరు వ్యాపారుల సమస్యలపై అసిస్టెంట్ టౌన్ ప్లానింగ్ అధికారితో చర్చలు…..
శేరిలింగంపల్లి
శేరిలింగంపల్లి నియోజకవర్గం గచ్చిబౌలి డివిజన్ పరిధిలోని నానక్‌రామ్‌గూడలో రోడ్డు విస్తరణ కారణంగా జీవనోపాధి కోల్పోయే పరిస్థితిని ఎదుర్కొంటున్న చిరు వ్యాపారులకు తక్షణమే ప్రత్యామ్నాయ వ్యాపార స్థలాలు కేటాయించి ఆదుకోవాలని బీజేపీ రాష్ట్ర అధికార ప్రతినిధి, శేరిలింగంపల్లి నియోజకవర్గ ఇన్‌చార్జ్ రవికుమార్ యాదవ్ ,గచ్చిబౌలి డివిజన్ తాజా మాజీ కార్పొరేటర్ గంగాధర్ రెడ్డి అధికారులను కోరారు.
స్థానిక చిరు వ్యాపారులతో కలిసి అసిస్టెంట్ టౌన్ ప్లానింగ్ అధికారి ప్రసీదను కలిసి వారి సమస్యలను వివరించి, వినతిపత్రం అందజేశారు. అనంతరం వారు మాట్లాడుతూ రోడ్డు విస్తరణ పనులకు తాము వ్యతిరేకం కాదని, అయితే అభివృద్ధి పేరుతో ఎన్నో సంవత్సరాలుగా చిన్నచిన్న వ్యాపారాలపై ఆధారపడి జీవిస్తున్న పేద కుటుంబాలు ఉపాధిని కోల్పోకుండా అధికారులు మానవతా దృక్పథంతో చర్యలు తీసుకోవాలన్నారు.
నానక్‌రామ్‌గూడలో పలువురు చిరు వ్యాపారులు పండ్లు, కూరగాయలు, టిఫిన్లు తదితర వస్తువులను విక్రయిస్తూ తమ కుటుంబాలను పోషించుకుంటున్నారని తెలిపారు. వీరిలో అనేక కుటుంబాలు రోజువారీ ఆదాయంపైనే ఆధారపడి జీవిస్తున్నాయని, ప్రస్తుతం బడ్డీ దుకాణాలు, చిన్న వ్యాపార కేంద్రాల తొలగింపు నిర్ణయంతో వారు తీవ్ర ఆందోళనకు గురవుతున్నారని పేర్కొన్నారు.
గతంలో కూడా రోడ్డు విస్తరణ పనుల కారణంగా నానక్‌రామ్‌గూడ ప్రాంత ప్రజలు తమ ఇళ్లు, స్థలాలకు సంబంధించి నష్టాలను ఎదుర్కొన్నారని గుర్తుచేశారు. ఇప్పుడు మిగిలి ఉన్న కొద్దిపాటి ఉపాధి అవకాశాలను కూడా కోల్పోవాల్సి వస్తే చిరు వ్యాపారుల కుటుంబాలు తీవ్ర ఆర్థిక ఇబ్బందుల్లోకి వెళ్లే ప్రమాదం ఉందన్నారు. ఇప్పటికే పెరిగిన నిత్యావసర వస్తువుల ధరల నేపథ్యంలో కుటుంబ పోషణ, పిల్లల చదువులు, ఇంటి అద్దెలు, వైద్య ఖర్చులు భరించడం వారికి మరింత భారంగా మారుతుందని ఆవేదన వ్యక్తం చేశారు.
నగర అభివృద్ధి, మెరుగైన రహదారులు, ట్రాఫిక్ సమస్యల పరిష్కారం ఎంత ముఖ్యమో, అదే విధంగా పేద ప్రజల జీవనోపాధిని కాపాడటం కూడా అంతే ముఖ్యమని వారు స్పష్టం చేశారు. ట్రాఫిక్‌కు ఎలాంటి ఆటంకం కలగకుండా, ప్రజలకు కూడా ఇబ్బందులు తలెత్తకుండా అనువైన ప్రాంతాల్లో ప్రత్యామ్నాయ వ్యాపార స్థలాలను గుర్తించి బాధితులకు కేటాయించాలని సూచించారు.
అధికారులు చిరు వ్యాపారుల వివరాలను తక్షణమే సేకరించి, ఎన్నో ఏళ్లుగా అక్కడే వ్యాపారాలు చేసుకుంటూ జీవిస్తున్న అర్హులైన వారికి ప్రాధాన్యత ఇవ్వాలని కోరారు. ప్రత్యామ్నాయ స్థలాల కేటాయింపుతో పాటు, వ్యాపారాలను తిరిగి ప్రారంభించుకునేందుకు అవసరమైన ఏర్పాట్లపై కూడా సానుకూలంగా పరిశీలించాలని విజ్ఞప్తి చేశారు. తొలగింపుల వల్ల ఎవరూ అన్యాయంగా నష్టపోకుండా, తగిన పరిష్కారం చూపిన తర్వాతే వారి జీవనోపాధికి సంబంధించిన చర్యలు చేపట్టాలని కోరారు.
పేద చిరు వ్యాపారుల సమస్యలను అధికారుల దృష్టికి తీసుకెళ్లి వారికి న్యాయం జరిగేలా కృషి చేస్తామని హామీ ఇచ్చారు. చిరు వ్యాపారులు సమాజంలో కీలక భాగమని, సామాన్య ప్రజలకు నిత్యావసర వస్తువులు, ఆహార పదార్థాలను అందిస్తూ తమ శ్రమతో కుటుంబాలను పోషించుకుంటున్నారని పేర్కొన్నారు. వారి కష్టాలను గుర్తించి, వారి జీవనోపాధికి భంగం కలగకుండా అధికారులు తగిన నిర్ణయం తీసుకోవాలని కోరారు.
పేదల పొట్ట కొట్టే అభివృద్ధి కాకుండా, అందరికీ ప్రయోజనం చేకూర్చే అభివృద్ధి జరగాలని అన్నారు. రోడ్డు విస్తరణ పనులు సజావుగా సాగడంతో పాటు చిరు వ్యాపారుల కుటుంబాలు రోడ్డున పడకుండా చూడాల్సిన బాధ్యత అధికారులపై ఉందని పేర్కొన్నారు. బాధిత చిరు వ్యాపారులకు న్యాయం జరిగే వరకు వారికి అండగా నిలుస్తామని స్పష్టం చేశారు.
ప్రత్యామ్నాయ ఏర్పాట్లపై అధికారుల సానుకూల స్పందన
చిరు వ్యాపారుల సమస్యలను విన్న అసిస్టెంట్ టౌన్ ప్లానింగ్ అధికారి ప్రసీద సానుకూలంగా స్పందించినట్లు నాయకులు తెలిపారు. బాధితులకు ప్రత్యామ్నాయ ఏర్పాట్లు చేసే అంశాన్ని పరిశీలించి తగిన చర్యలు తీసుకుంటామని ఆమె హామీ ఇచ్చినట్లు పేర్కొన్నారు.
ఈ కార్యక్రమంలో గచ్చిబౌలి డివిజన్ అధ్యక్షుడు శివ సింగ్, సీనియర్ నాయకులు మీన్ లాల్ సింగ్, శేఖర్, బన్సీ లాల్ సింగ్, సోహన్ లాల్, మునావర్, కవిత భాయ్, మోహన్ లాల్, సంపత్, రాజ్ కుమార్, శ్రీను, రాజు, యాదయ్య, శ్రీశైలం,బీజేపీ నాయకులు, కార్యకర్తలు, నానక్‌రామ్‌గూడ వాసులు, బాధిత చిరు వ్యాపారులు పెద్ద సంఖ్యలో పాల్గొన్నారు.
