- బచ్పన్ అకాడమిక్ హైట్స్ పబ్లిక్ స్కూల్ చిన్నారి విద్యార్థుల నిరసన
- చిన్నారుల ఆందోళనకు డిప్యూటీ కమిషనర్ సానుకూల స్పందన
ఎల్బీనగర్
పాఠశాల ఎదుట పేరుకుపోతున్న చెత్తను తొలగించి పరిశుభ్రమైన వాతావరణం కల్పించాలని కోరుతూ,చంపాపేట్ వైశాలి నగర్ లోని బచ్పన్ అకాడమిక్ హైట్స్ పబ్లిక్ స్కూల్ చిన్నారి విద్యార్థులు వినూత్నంగా నిరసన చేపట్టారు. పాఠశాల ఎదురుగా చెత్తను డంపింగ్ చేయడంతో విద్యార్థులు, ఉపాధ్యాయులు తీవ్ర ఇబ్బందులు ఎదుర్కొంటున్నారని పేర్కొంటూ బుధవారం జిహెచ్ఎంసి ఎల్బీనగర్ సర్కిల్ డిప్యూటీ కమిషనర్ బోనగిరి శ్రీనివాస్ కార్యాలయం ముందు చిన్నారులు ఆందోళనకు దిగారు.‘మాకు చెత్త వద్దు… శుభ్రమైన వాతావరణం కావాలి’, ‘స్కూల్ ముందు డంపింగ్ను తొలగించాలి’ అంటూ విద్యార్థులు నినాదాలు చేస్తూ తమ సమస్యను అధికారుల దృష్టికి తీసుకెళ్లారు. సాధారణంగా పెద్దలు, స్థానికులు చేపట్టే నిరసనలకు భిన్నంగా చిన్నారులే ముందుకొచ్చి తమ సమస్యను చెప్పడం స్థానికంగా చర్చనీయాంశంగా మారింది. పాఠశాల పరిసరాల్లో చెత్త పేరుకుపోవడం వల్ల దుర్వాసనతో పాటు దోమలు, ఈగలు పెరిగే అవకాశం ఉందని, విద్యార్థుల చదువుకు, ఆరోగ్యకరమైన వాతావరణానికి ఇబ్బందులు కలుగుతున్నాయని వారు అధికారులకు వివరించారు.
చిన్నారుల సమస్యపై డీసీ సానుకూల స్పందన
విద్యార్థుల ఆందోళనను డిప్యూటీ కమిషనర్ బోనగిరి శ్రీనివాస్ సానుకూలంగా స్వీకరించారు. చిన్నారులు తమ సమస్యను స్వయంగా అధికారుల దృష్టికి తీసుకురావడాన్ని అభినందించిన డీసీ, పాఠశాల ఎదుట చెత్త డంపింగ్ సమస్యను పరిశీలించి అవసరమైన చర్యలు తీసుకుంటామని హామీ ఇచ్చినట్లు తెలిసింది.
పాఠశాలలు,ఆసుపత్రులు, ప్రజలు ఎక్కువగా రాకపోకలు సాగించే ప్రాంతాల్లో పరిశుభ్రతకు అత్యంత ప్రాధాన్యత ఇవ్వాల్సిన అవసరం ఉందని డీసీ పేర్కొన్నారు. సమస్యను కేవలం చెత్త తొలగింపుతోనే కాకుండా, తిరిగి అదే ప్రాంతంలో చెత్త వేయకుండా చర్యలు తీసుకునే దిశగా కూడా పరిశీలిస్తామని తెలిపారు.
చిన్న పిల్లల నిరసనకు అభినందనలు
చిన్న వయసులోనే పరిసరాల పరిశుభ్రతపై అవగాహనతో విద్యార్థులు ముందుకు రావడం అభినందనీయమని పలువురు పేర్కొన్నారు. నగర పరిశుభ్రత విషయంలో ప్రజలు కూడా బాధ్యతగా వ్యవహరించాలని, బహిరంగ ప్రదేశాల్లో చెత్త వేయకుండా సహకరించాలని అధికారులు సూచించారు. జిహెచ్ఎంసి అధికారిక మార్గదర్శకాల ప్రకారం పాఠశాలల్లో రోజువారీ పరిశుభ్రత, చెత్త సేకరణ వంటి అంశాలకు కూడా ప్రాధాన్యత ఉంది.చిన్నారులు అడిగింది పెద్ద డిమాండ్ కాదు…
చదువుకునే చోట చెత్త లేకుండా చూడాలని మాత్రమే!
వారి విజ్ఞప్తికి, డిప్యూటీ కమీషనర్ ఇచ్చిన సానుకూల స్పందనతో సమస్యకు త్వరలోనే పరిష్కారం లభిస్తుందనే ఆశాభావం వ్యక్తమవుతోంది.
