కేంద్ర పథకాలను ప్రజల్లోకి తీసుకెళ్లడంలో పీఐబీ పాత్ర కీలకం : రాష్ట్ర గవర్నర్ శ్రీ శివ ప్రతాప్ శుక్లా

• పోషణ మాసం కార్యక్రమంకు గవర్నర్ ను ఆహ్వానించిన పీఐబీ అదనపు డైరెక్టర్‌ జనరల్‌

హైదరాబాద్:

కేంద్ర ప్రభుత్వ సంక్షేమ పథకాలను దేశ ప్రజలందరికీ చేరువ చేయడంలో ప్రెస్ ఇన్ఫర్మేషన్ బ్యూరో (పీఐబీ) నిర్వహిస్తున్న పాత్ర అత్యంత కీలకమని రాష్ట్ర గవర్నర్ శ్రీ శివ ప్రతాప్ శుక్లా ప్రశంసించారు. కేంద్ర పాలిత పథకాలపై ప్రజల్లో విస్తృతమైన అవగాహన కల్పిస్తూ, ప్రతి ఒక్కరూ ప్రభుత్వ ఫలాలను సద్వినియోగం చేసుకునేలా అధికారులు కృషి చేయాలని ఆయన పిలుపునిచ్చారు.
శుక్రవారం లోక్ భవన్ లో గవర్నర్ శ్రీ శివ ప్రతాప్ శుక్లాను పీఐబీ అదనపు డైరెక్టర్ జనరల్ శ్రీమతి శ్రుతి పాటిల్ మర్యాదపూర్వకంగా కలిశారు. ఈ సమావేశంలో పీఐబీ జాయింట్ డైరెక్టర్ డా. మానస్ కృష్ణకాంత్, సెంట్రల్ బ్యూరో ఆఫ్ కమ్యూనికేషన్ (సీబీసీ) అసిస్టెంట్ డైరెక్టర్ కె. శ్రీనివాసరావు తదితరులు పాల్గొన్నారు.

*ప్రజా సంక్షేమమే ధ్యేయం:

• సమగ్ర ప్రచారం: తెలంగాణ రాష్ట్రంలో పీఐబీ మరియు సీబీసీ చేపడుతున్న వివిధ కార్యకలాపాలను ఏడీజీ శ్రుతి పాటిల్ గవర్నర్‌కు వివరించారు. కేంద్ర ప్రభుత్వ పథకాలు, విధానాలను విభిన్న మాధ్యమాల ద్వారా ప్రజలకు చేరవేస్తున్న తీరును ప్రస్తావించారు.
• జర్నలిస్టులకు శిక్షణ: గ్రామీణ ప్రాంతాల్లో నిర్వహిస్తున్న ఐసీఓపీ (ఇంటిగ్రేటెడ్ కమ్యూనికేషన్ అండ్ అవుట్ రీచ్ ప్రోగ్రామ్) కార్యక్రమాలతో పాటు, జర్నలిస్టుల వృత్తిగత నైపుణ్యాల పెంపుకోసం ఏర్పాటు చేస్తున్న ‘వార్తాలాప్స్’ సదస్సులు, ప్రెస్ టూర్ల విశేషాలను వెల్లడించారు.

*పోషణ్ మాహ్‌కు ఆహ్వానం:
రాబోయే సెప్టెంబర్ నెలలో అత్యంత ప్రతిష్టాత్మకంగా నిర్వహించనున్న ‘పోషణ్ మాహ్‌’ (పోషణ్ అభియాన్) కార్యక్రమానికి సంబంధించి ఏర్పాటు చేయనున్న ప్రత్యేక ఐసీఓపీ కార్యక్రమానికి ముఖ్య అతిథిగా విచ్చేయాల్సిందిగా గవర్నర్‌ను అధికారికంగా ఆహ్వానించారు.
ఈ సమావేశం సందర్భంగా మహాత్మా గాంధీ జీవిత విశేషాలపై ముద్రించిన ప్రత్యేక పుస్తకంతో పాటు, కేంద్ర ప్రభుత్వ 12 ఏళ్ల ప్రగతి మరియు సాధించిన విజయాలను కళ్లకు కట్టే ప్రచురణలను గవర్నర్‌కు అందజేశారు. అంతకుముందు, ఉత్తరప్రదేశ్ రాష్ట్రానికి చెందిన విశ్రాంత ఐఏఎస్ అధికారి శ్రీ లలిత్ వర్మ కూడా రాష్ట్ర గవర్నర్‌ను మర్యాదపూర్వకంగా కలిశారు.