అత్యవసర వేళల్లో మునుపెన్నడూ లేని వేగం.. జాతీయ స్థాయిలో అగ్రగామిగా మన రాష్ట్రం.
హైదరాబాద్:
ఆపదలో ఉన్న పౌరులకు క్షణాల వ్యవధిలో రక్షణ అందించే బృహత్తర లక్ష్యంతో తెలంగాణ పోలీసు శాఖ మరో అడుగు ముందుకు వేసింది. అత్యాధునిక కృత్రిమ మేధస్సు (AI) సాంకేతికతను జోడించి, ‘తెలంగాణ ఎమర్జెన్సీ రెస్పాన్స్ సపోర్ట్ సిస్టమ్’ (టీజీ-ఈఆర్ఎస్ఎస్) ఆధ్వర్యంలో ‘డైల్ 112’ సేవలను రాష్ట్రవ్యాప్తంగా అధికారికంగా ప్రారంభించారు.
హైదరాబాద్లోని తెలంగాణ సమీకృత కమాండ్ అండ్ కంట్రోల్ కేంద్రంలో నిర్వహించిన ఈ ప్రారంభోత్సవ వేడుకకు రాష్ట్ర పోలీసు బాస్ (డీజీపీ) సి.వి. ఆనంద్, వీరన్న ముఖ్య అతిథిగా హాజరై దిశానిర్దేశం చేశారు. ఈ కార్యక్రమంలో పలువురు ఉన్నతాధికారులు ఉత్సాహంగా పాల్గొన్నారు. ‘ఒకే దేశం – ఒకే అత్యవసర నంబరు’ అనే నినాదంతో ఈ వ్యవస్థ రూపుదిద్దుకుంది.
*సాంకేతికతతో ట్రిపుల్ స్పీడ్.. మారిన అత్యవసర వ్యవస్థ రూపురేఖలు:
గతంలో ఉన్న పద్ధతులకు స్వస్తి పలికి, పూర్తిస్థాయిలో డిజిటల్ పరిజ్ఞానాన్ని ఈ వ్యవస్థకు అనుసంధానించారు. దీనివల్ల కాల్ ప్రాసెసింగ్ సమయం భారీగా తగ్గింది:
- కాల్ టేకర్ సమయం: గతంలో 100 సెకండ్లు ఉండగా, ప్రస్తుతం 69 సెకన్లకు తగ్గింది.
- డిస్పాచర్ సమయం: 90 సెకన్ల నుండి 64 సెకన్లకు పరిమితమైంది.
- మొత్తం ప్రాసెసింగ్ సమయం: 190 సెకన్ల నుండి 133 సెకన్లకు తగ్గి, ఏకంగా 30 శాతం మేర మెరుగైన ఫలితాలు వస్తున్నాయి.
ప్రస్తుతం రాష్ట్రంలో సగటు అత్యవసర ప్రతిస్పందన సమయం పట్టణ ప్రాంతాల్లో 6 నిమిషాలు, గ్రామీణ ప్రాంతాల్లో 15 నిమిషాలు ఉండగా.. మొత్తం రాష్ట్ర సగటు 10 నిమిషాల 30 సెకన్లుగా నమోదవుతోంది. జాతీయ సగటు (18 నిమిషాలు)తో పోలిస్తే మన రాష్ట్రం అగ్రస్థానంలో నిలిచింది.
*కృత్రిమ మేధస్సు (AI) ప్రత్యేకతలు:
- స్మార్ట్ ఫిల్టరింగ్: నకిలీ, బ్ల్యాంక్, స్పామ్ మరియు అత్యవసరానివి కాని కాల్స్ను ఏఐ ద్వారా పూర్తిగా తొలగించి, సిబ్బందిపై భారాన్ని తగ్గిస్తారు.
- కాల్ రూటింగ్ & ప్రాధాన్యత: ఘటన తీవ్రతను బట్టి పోలీస్, అగ్నిమాపక, అంబులెన్స్, మహిళా భద్రత తదితర విభాగాలకు తక్షణమే సమాచారం చేరుతుంది.
- లైవ్ లొకేషన్ గుర్తింపు: ఫోన్ చేసినవారు తమ చిరునామా సరిగ్గా చెప్పలేకపోయినా, అధునాతన లొకేషన్ సర్వీసెస్ ద్వారా 94 శాతానికి పైగా కచ్చితమైన స్థానాన్ని ఇట్టే పసిగట్టవచ్చు.
- డ్రోన్ల ప్రవేశం: ప్రయోగాత్మకంగా హైదరాబాద్, సైబరాబాద్, మల్కాజిగిరి మరియు ఫ్యూచర్ సిటీ కమిషనరేట్లలో ఏఐ ఆధారిత డ్రోన్లను రంగంలోకి దించనున్నారు.
*పటిష్టమైన యంత్రాంగం:
‘డైల్ 112’ కేంద్రం 164 మంది ప్రత్యేక శిక్షణ పొందిన సిబ్బందితో 24 గంటలూ పనిచేస్తుంది. రాష్ట్రవ్యాప్తంగా ఉన్న 1,860 పెట్రోలింగ్ వాహనాలు (788 ఫోర్-వీలర్లు, 1,072 టూ-వీలర్లు) ఈ డిజిటల్ వేదికతో అనుసంధానం చేయబడ్డాయి. ఘటన జరిగిన ప్రాంతానికి అతిసమీపంలో ఉన్న పెట్రోలింగ్ వాహనాన్ని ఏఐ స్వయంచాలకంగా గుర్తించి కేటాయిస్తుంది.
అత్యవసర సమయాల్లో ప్రజలు ఇతర నంబర్ల గురించి ఆలోచించకుండా నేరుగా ‘112’ నంబర్కు కాల్ చేసి సేవలు పొందాలని అధికారులు విజ్ఞప్తి చేశారు. ప్రతి సెకను ప్రాణాలను కాపాడుతుందని, బాధితులకు సకాలంలో అండగా నిలవడమే ఈ వ్యవస్థ ప్రధాన ధ్యేయమని స్పష్టం చేశారు.
