లండన్ ప్రవాసులకు సీఎం రేవంత్రెడ్డి పిలుపు!
రాష్ట్ర పునర్నిర్మాణంలో భాగస్వాములు కండి.. అంతర్జాతీయ ప్రగతికి రాయబారులుగా నిలవండి
లండన్:
ప్రపంచ పటంలో తెలంగాణను అగ్రగామిగా నిలపడమే లక్ష్యంగా ప్రజా ప్రభుత్వం ప్రతిష్టాత్మకంగా చేపట్టిన ‘తెలంగాణ రైజింగ్’ మహా యజ్ఞాన్ని విశ్వవ్యాప్తం చేయాలని ముఖ్యమంత్రి ఎనుముల రేవంత్రెడ్డి లండన్ గడ్డపై నుంచి ప్రవాస తెలుగు ప్రజలకు బలమైన పిలుపునిచ్చారు. రాష్ట్ర అభివృద్ధి, భవిష్యత్ ప్రగతి ప్రణాళికలే అజెండాగా ఆదివారం ఉదయం లండన్లో నిర్వహించిన అత్యున్నత స్థాయి ప్రవాస తెలుగు ఆత్మీయ సమావేశం దిగ్విజయంగా ముగిసింది. ఈ సభలో ముఖ్యమంతారితో పాటు ఐటీ, పరిశ్రమల శాఖల మంత్రి దుద్దిళ్ల శ్రీధర్బాబు ప్రత్యేకంగా పాల్గొని ప్రవాసాంధ్రులతో మమేకమయ్యారు.
*ప్రగతి రథసారథులుగా ప్రవాసులు: సీఎం రేవంత్
ఈ సందర్భంగా సీఎం రేవంత్రెడ్డి ప్రవాస తెలుగువారితో ఆత్మీయంగా ముచ్చటించారు. మాతృభూమి రుణం తీర్చుకునే సువర్ణావకాశం నేడు తెలంగాణలో సాకారమవుతోందని స్పష్టం చేశారు. ప్రభుత్వ కార్యాచరణను వివరిస్తూ..
- అంతర్జాతీయ ప్రచారం: తెలంగాణ రైజింగ్ ఉద్దేశాలను ప్రపంచ నలుమూలలా వ్యాపింపజేస్తూ, విదేశీ గడ్డపై రాష్ట్రానికి నిజమైన రాయబారులుగా వ్యవహరించాలని కోరారు.
- భాగస్వామ్య సర్కార్: కేవలం పాలన మాత్రమే కాకుండా, రాష్ట్ర పారిశ్రామిక, సాంకేతిక పురోగతిలో ప్రవాస పారిశ్రామికవేత్తలు, నిపుణులు భాగస్వాములు కావాలని ఆకాంక్షించారు.
- భవిష్యత్ ప్రణాళికలు: రాబోయే రోజుల్లో రాష్ట్ర సర్వతోముఖాభివృద్ధికి అనుసరించాల్సిన వినూత్న విధివిధానాలపై ప్రవాస సంఘాల ప్రతినిధులతో లోతుగా చర్చించారు.
*పారిశ్రామిక ప్రగతికి పదునైన అడుగులు: మంత్రి శ్రీధర్బాబు
సమావేశంలో మంత్రి దుద్దిళ్ల శ్రీధర్బాబు మాట్లాడుతూ.. తెలంగాణను గ్లోబల్ హబ్గా మార్చేందుకు ప్రభుత్వం అలుపెరగకుండా శ్రమిస్తోందన్నారు. నూతన పారిశ్రామిక విధానాల ద్వారా విదేశీ పెట్టుబడులను ఆకర్షిస్తున్నామని, ప్రవాసులు తమ నైపుణ్యాలను, పెట్టుబడులను స్వరాష్ట్రానికి మళ్లించి ప్రగతిలో భాగం కావాలని పిలుపునిచ్చారు. లండన్ వేదికగా జరిగిన ఈ సమావేశం ప్రవాస తెలుగు గుండెల్లో నూతనోత్సాహాన్ని నింపింది.
