హైదరాబాద్:
సంస్కృతి, సంప్రదాయాల సమ్మేళనంగా అలై బలై
తెలంగాణ సాంస్కృతిక వైభవానికి ప్రతీకగా నిలుస్తున్న ప్రతిష్టాత్మక అలై బలై కార్యక్రమ నిర్వహణపై హర్యానా రాష్ట్ర మాజీ గవర్నర్, ప్రముఖ ప్రజానేత బండారు దత్తాత్రేయతో తెలంగాణ జర్నలిస్ట్ యూనియన్ రాష్ట్ర నాయకులు ప్రత్యేకంగా సమావేశమయ్యారు. హైదరాబాద్ నగరంలో జరిగిన ఈ సమావేశంలో అలై బలై వేడుకల ఏర్పాట్లు, విశేషాలు మరియు ఈ మహోత్సవంలో పత్రికా రంగ ప్రతినిధుల భాగస్వామ్యం వంటి కీలక అంశాలపై లోతుగా చర్చలు జరిగాయి.
*సమన్వయంతో ఏర్పాట్లు – విలేకరుల క్రియాశీలక పాత్ర
ఈ సమావేశంలో తెలంగాణ జర్నలిస్ట్ యూనియన్ రాష్ట్ర అధ్యక్షులు కపర్ ప్రసాదరావు మరియు రాష్ట్ర ప్రధాన కార్యదర్శి బింగి స్వామి పాల్గొని, అలై బలై కార్యక్రమాన్ని గత సంవత్సరాలకంటే మరింత వైభవంగా నిర్వహించే దిశగా ప్రణాళికలను వివరించారు. జాతిని ఐకమత్యంగా నిలపడంలో, సమాజంలో సత్సంబంధాలను పెంపొందించడంలో అలై బలై వేదిక ఎంతగానో దోహదపడుతుందని నాయకులు అభిప్రాయపడ్డారు. ఈ బృహత్తర కార్యక్రమంలో నాల్గవ స్థంభమైన పత్రికా రంగం తరఫున విలేకరులు పూర్తి స్థాయిలో భాగస్వాములు కావాలని, కార్యక్రమ విజయానికి తమ వంతు సహకారం అందించాలని నిర్ణయించారు.
ఈ అలై బలై మహోత్సవం ద్వారా తెలుగు రాష్ట్రాల ప్రజల మధ్య సోదరభావం, అన్యోన్యత మరింత పరిఢవిల్లాలని ఆకాంక్షించడం జరిగింది.
