- చరిత్రలో సువర్ణాక్షర ఘట్టం: హైదరాబాద్ విమోచనం ద్వారా ప్రజలకు సిద్దించిన సంపూర్ణ స్వేచ్ఛ.
- చిరస్మరణీయం విమోచన వీరుల త్యాగాలు: రైతులు, యువకులు, మహిళల పోరాటాలను కొనియాడిన గవర్నర్ .
- సమైక్యతే ప్రగతికి సోపానం: అమరుల ఆశయ సాధనకు, నూతన తెలంగాణ నిర్మాణానికి ప్రతి ఒక్కరూ పునరంకితం కావాలని పిలుపు.
హైదరాబాద్
సమకాలీన భారత చరిత్రలో సువర్ణాక్షరాలతో లిఖించదగిన చారిత్రక ఘట్టం హైదరాబాద్ విమోచన దినోత్సవమని రాష్ట్ర గవర్నర్ శ్రీ శివప్రతాప్ శుక్లా ఉద్ఘాటించారు. 1948 సెప్టెంబరు 17న నాటి హైదరాబాద్ సంస్థానం భారత యూనియన్లో విలీనమై, ప్రజలకు సంపూర్ణ స్వేచ్ఛ సిద్దించిందని పేర్కొన్నారు. విమోచన దినోత్సవాన్ని పురస్కరించుకుని సికింద్రాబాద్ పరేడ్ గ్రౌండ్లో కేంద్ర ప్రభుత్వం ఆధ్వర్యంలో జరిగిన వేడుకల్లో దేశ ఉపరాష్ట్రపతి రాధాకృష్ణన్తో కలిసి గవర్నర్ పాల్గొన్నారు. అంతకుముందు బేగంపేట విమానాశ్రయానికి విచ్చేసిన ఉపరాష్ట్రపతికి ఆయన ఘనంగా స్వాగతం పలికారు.
*విమోచన వీరుల త్యాగాలు చిరస్మరణీయం
చరిత్రలో నిలిచిపోయేలా సాగిన ఈ విమోచన పోరాటంలో రైతులు, యువకులు, మహిళలు సహా ఎందరో మహానుభావులు ప్రాణత్యాగాలు చేశారని గవర్నర్ కొనియాడారు. నాటి సంస్థానంలో ప్రస్తుత తెలంగాణతో పాటు మరాఠ్వాడా, కర్ణాటక ప్రాంతాలు అంతర్భాగంగా ఉండేవని గుర్తుచేశారు. జాతి సమైక్యత కోసం సర్దార్ వల్లభ్భాయ్ పటేల్ నిర్వహించిన చారిత్రక పాత్ర దేశ చరిత్రలో అత్యంత కీలకమైనదని ప్రశంసించారు. వీరుల ధైర్య సాహసాలు, త్యాగనిరతి భావితరాలకు నిత్యం మార్గదర్శకమని స్పష్టం చేశారు.
*ఐక్యతతోనే ప్రగతి సాధన
ఈ చారిత్రక దినోత్సవం కేవలం గతాన్ని స్మరించుకోవడమే కాకుండా, ప్రజాస్వామ్య విలువలు మరియు జాతీయ సమైక్యతను పరిరక్షించాలనే సంకల్పాన్ని పునరుద్ఘాటించే వేదిక అని గవర్నర్ పిలుపునిచ్చారు. అమరుల ఆశయాలకు అనుగుణంగా శక్తివంతమైన, సుసంపన్నమైన, అభివృద్ధి చెందిన నూతన తెలంగాణ నిర్మాణానికి ప్రతి ఒక్కరూ పునరంకితం కావాలని ఆకాంక్షించారు. రాష్ట్ర ప్రజలందరికీ శాంతి, ప్రగతి, సౌభాగ్యాలు కలగాలని మనసారా దీవించారు.
