ఎల్బీనగర్:
లయన్స్ క్లబ్స్ ఇంటర్నేషనల్ ఫౌండేషన్ మెక్డొనాల్డ్స్ సహకారంతో ఎల్బీనగర్ ప్రాంతంలో ఉన్న అనాథ విద్యార్థి గృహంలో ప్రత్యేక కమ్యూనిటీ ఔట్ రీచ్ ప్రోగ్రామ్ నిర్వహించింది. అనాథ విద్యార్థులకు ఆనందాన్ని పంచడంతో పాటు, వారిలో సృజనాత్మకతను ప్రోత్సహించడం, అవసరమైన సహాయాన్ని అందించడం ఈ కార్యక్రమం ముఖ్య ఉద్దేశ్యంగా నిలిచింది.ఈ కార్యక్రమంలో భాగంగా విద్యార్థులకు డ్రాయింగ్ కాంపిటీషన్, వివిధ రకాల ఆటలు నిర్వహించారు. విద్యార్థులు ఎంతో ఉత్సాహంగా పాల్గొని తమ ప్రతిభను ప్రదర్శించారు. అనంతరం నిర్వహించిన మ్యాజిక్ షో చిన్నారులను విశేషంగా ఆకట్టుకుంది. ఆటలు, పోటీలు, వినోద కార్యక్రమాలతో అనాథ విద్యార్థులకు మంగళవారం ఎంతో ఆనందదాయకమైన, చిరస్మరణీయమైన అనుభూతిని అందించింది. విద్యార్థుల రోజువారీ అవసరాలకు అండగా నిలిచే ఉద్దేశంతో ఎల్సీఐఎఫ్ మెక్డొనాల్డ్స్ వారు కలిసి రూ.1.50 లక్షల విలువైన కిరాణా సరుకులను, వివిధ తరగతుల పుస్తకాలను, స్టేషనరీ,శానిటేషన్ వస్తువులను అనాథ విద్యార్థి గృహానికి గృహ అధ్యక్షులు మార్గం రాజేష్ సమక్షంలో అందజేశారు.ఈ సహాయం విద్యార్థుల నిత్యావసరాలను తీర్చడంలో ఎంతో ఉపయోగపడనుంది. ఈ కార్యక్రమంలో లయన్స్ నాగరాజు ఏ. అమర్నాథ్ రావు,తీగల మోహన్ రావు, ఎల్సీఐఎఫ్ కోఆర్డినేటర్ పూజా తన్యా, నరసింహ రాజు, పద్మావతి, ప్రకాశ్ రావు,గంప రమేష్ తో పాటు పలువురు లయన్స్ సభ్యులు పాల్గొన్నారు. ఈ సందర్భంగా లయన్స్ సభ్యులు విద్యార్థులతో ఆప్యాయంగా ముచ్చటించి, వివిధ కార్యక్రమాల్లో వారు చూపిన ఉత్సాహాన్ని, ప్రతిభను అభినందించారు. సమాజ సేవ, చిన్నారులకు అండగా నిలవడం, వారి జీవితాల్లో ఆనందం మరియు ఆశను నింపడం పట్ల లయన్స్ క్లబ్స్ ఇంటర్నేషనల్ ఫౌండేషన్, దాని భాగస్వాములు కలిగి ఉన్న నిబద్ధతకు ఈ కార్యక్రమం మంచి నిదర్శనంగా నిలిచింది.
