- మీసేవ ధ్రువపత్రాలకు పదహేను అంచెల రక్షణ కవచం.
- అధునాతన సాంకేతిక పరిజ్ఞానంతో రూపొందించిన ప్రత్యేక కాగితం ఆవిష్కరణ.
- నీటిని తట్టుకునే స్వభావం… లామినేషన్ అవసరమే లేని నాణ్యత.
- ప్రజాభవన్‌లో కొత్త సెక్యూరిటీ పేపర్‌ను ప్రారంభించిన ఐటీ, పరిశ్రమల శాఖ
హైదరాబాద్
ప్రభుత్వ ధ్రువపత్రాల భద్రత, మన్నిక, విశ్వసనీయతలను అత్యున్నత ప్రమాణాలకు తీసుకెళ్లే దిశగా రాష్ట్ర ప్రభుత్వం ఒక సంచలనాత్మక నిర్ణయం తీసుకుంది. ఇకపై మీసేవ కేంద్రాల ద్వారా జారీ చేసే వివిధ రకాల సర్టిఫికెట్లు నీటిలో తడిసినా చెడిపోవు… చేత్తో పీకినా సులభంగా చిరగవు. నకిలీ పత్రాల సృష్టికి తావులేకుండా ఏకంగా పదహేను రకాల భద్రతా ప్రమాణాలతో (సెక్యూరిటీ ఫీచర్లు) ప్రత్యేకంగా తయారు చేసిన నూతన కాగితాన్ని మంగళవారం ప్రజాభవన్‌లో జరిగిన కార్యక్రమంలో ఐటీ, పరిశ్రమల శాఖ ఆవిష్కరించింది.
శాస్త్రీయ బలం… సుదీర్ఘ మన్నిక
సాధారణంగా కాగితాలు వాతావరణంలోని తేమ, వెలుతురు, కాలక్రమేణా జరిగే ఆమ్లత్వ మార్పుల వల్ల పసుపు రంగులోకి మారి చివికిపోతాయి. ఈ సమస్యకు పరిష్కారంగా రసాయనిక మార్పులను తట్టుకునే అత్యున్నత ప్రమాణాల తోలు రహిత ‘సింథటిక్ పోలిమర్’ మిశ్రమ సాంకేతికతతో ఈ కొత్త కాగితాన్ని రూపొందించారు.
- నీటి నిరోధకత: సాంప్రదాయ కాగితాలు నీటిని త్వరగా పీల్చుకుని నీరుగారిపోతాయి. కానీ ఈ నూతన పత్రం ఉపరితలం నీటిని అడ్డుకునే నిరోధక శక్తి కలిగి ఉంటుంది. కాబట్టి ప్రయాణాలు, వర్షాలు లేదా అనుకోని ప్రమాదాల్లో నీళ్లు పడినా అక్షరాలు చెరిగిపోవు, కాగితం నానదు.
- భౌతిక బలం: పత్రాలను మడతపెట్టడం వల్ల మూలల్లో ఏర్పడే ఒత్తిడిని తట్టుకుని, ఏళ్ల తరబడి మడత మార్కులు పడకుండా నిలిచే సాగే గుణం ఇందులో ఉంది.
- లామినేషన్ ఆవశ్యకత శూన్యం: సాధారణంగా ధ్రువపత్రాలు పాడవకుండా ప్రజలు ప్లాస్టిక్ లామినేషన్ చేయిస్తుంటారు. కాలక్రమేణా ఆ ప్లాస్టిక్ లోపల తేమ చేరి సర్టిఫికెట్ దెబ్బతినే ప్రమాదం ఉంది. కొత్త కాగితం స్వతహాగానే ఆ తరహా రక్షణను కలిగి ఉండటంతో ఇకపై ప్రజలకు లామినేషన్ చేయించాల్సిన ఖర్చు, శ్రమ తప్పుతాయి.
నకిలీలకు చెక్ పెట్టే భద్రతా కవచం
ఈ నూతన కాగితంలో అదృశ్య గుర్తులతో పాటు సాంకేతిక పరిజ్ఞానంతో మాత్రమే గుర్తించగలిగే పదహేను రకాల భద్రతా ప్రమాణాలను నిక్షిప్తం చేశారు. నకిలీ ధ్రువపత్రాలను సృష్టించడం, రంగుల ముద్రణ యంత్రాల ద్వారా నకళ్లను తీసి మోసాలకు పాల్పడటం ఇకపై అసాధ్యం. భద్రతా కారణాల దృష్ట్యా ఈ పదిహేను ఫీచర్ల పూర్తి వివరాలను గోప్యంగా ఉంచినప్పటికీ, ప్రభుత్వ గుర్తింపు ప్రక్రియలో ఇవి కీలక పాత్ర పోషించనున్నాయి.
శాశ్వత ఆస్తుల వంటి పత్రాలకు రక్షణ
ఈ సందర్భంగా ఐటీ శాఖ ప్రతినిధులు మాట్లాడుతూ… జనన, మరణ ధ్రువపత్రాలతో పాటు విద్య, ఉద్యోగ, భూమి హక్కులకు సంబంధించిన పత్రాలు పౌరుల జీవితాంతం అవసరమయ్యే కీలక ఆధారాలని పేర్కొన్నారు. రెండేళ్ల కాల పరిమితి ఉండే పత్రాల కంటే, జీవితాంతం భద్రంగా దాచుకోవాల్సిన పత్రాల రక్షణకు ఈ సాంకేతికత ఎంతో దోహదపడుతుందని తెలిపారు.
రెండు వేల పదకొండు నుంచి మీసేవ పరిధిలో వాడుకలో ఉన్న పాత కాగితం స్థానంలో అత్యున్నత నాణ్యత కలిగిన ఈ నూతన కాగితాన్ని ప్రవేశపెట్టడం ద్వారా ప్రభుత్వ వ్యవస్థలపై ప్రజల్లో విశ్వసనీయత మరింత పెరుగుతుందని ప్రతినిధులు ధీమా వ్యక్తం చేశారు.
ఈ ఆవిష్కరణ కార్యక్రమంలో ప్రజాప్రతినిధులు రాజ్ ఠాకూర్, విజయ రమణారావు, ఎలక్ట్రానిక్ సర్వీస్ డెలివరీ కమిషనర్ టి. రవికిరణ్, వివిధ శాఖల ఉన్నతాధికారులు, ముద్రణా సంస్థల ప్రతినిధులు పాల్గొన్నారు.
